Thaçi flet për anulimin e samitit të Parisit: Institucionet e Kosovës gabuan

Presidenti i vendit, Hashim Thaçi ka shkruar nga Bjellorusia për anulimin e Samitit të Parisit.

Thaçi thotë se është informuar për anulimin e këtij samiti nga partnerët evropianë.

Ai fajtor për këtë dështim i ka bërë vendimet e nxituara e të gabuara strategjikisht të institucioneve shtetërore të Kosovës.

Për Thaçin, para ndërkombëtarëve, institucionet e Kosovës janë ato që e kanë bllokuar procesin e dialogut.

Samiti i Parisit ishte paraparë të mbahej me 1 korrik në Paris të Francës, ku zyrtarët e Kosovës dhe Serbisë do të takoheshin në kuadër të dialogut. Ky takim do të mbahej nën patronatin e zyrës së Presidentit Macron dhe Kancelares gjermane, Merkel.

Ky është shkrimi i plotë i Hashim Thaçit:

Dje dhe sot nga partnerët evropianë u informova se pas përpjekjeve të shumta për sukses, Samiti i Parisit, si vazhdim i atij në Berlin, definitivisht nuk do të mbahet. Ishte planifikuar vazhdimi i dialogut Kosovë – Serbi, i udhëhequr nga BE-ja, me mbështetjen unike dhe të fortë francezo-gjermane.

Vendimet dhe veprimet e nxituara, të pakoordinuara dhe të gabuara strategjikisht të institucioneve shtetërore të Republikës së Kosovës, kanë dëmtuar rëndë respektin dhe mbështetjen e partnerëve tanë perëndimorë për Kosovën. Si rrjedhojë, partnerët tanë ndërkombëtarë, fatkeqësisht sot e mbajnë Kosovën përgjegjëse për bllokimin e dialogut, për dështimin e takimit të paraparë në Paris dhe për prolongimin e vendimit për liberalizimin e vizave për qytetarët tanë.

Dështimi i procesit të filluar në Berlin dhe anulimi i Samitit të Parisit, duhet të jetë moment reflektimi për akterët vendorë dhe faktorët ndërkombëtarë udhëheqës dhe mbështetës të procesit të dialogut për normalizim dhe pajtim mes shteteve dhe popujve tanë. Ngërçi në dialog dhe anulimi i Samitit të Parisit për të dy vendet, Kosovën dhe Serbinë, shënon hap prapa për të ardhmen evropiane. Prandaj, i bëj thirrje BE-së dhe SHBA-së që të mos i ndalin përpjekjet e tyre për rifillimin e dialogut dhe arritjen e marrëveshjes paqësore. HTH