Automjeti elektrik MG Comet EV me çmim më pak se 10 mijë dollarë
Automjetet elektrike janë ende mjaft të shtrenjta në krahasim me modelet e një kategorie të ngjashme me motorë benzinë dhe naftë, dhe për shumë njerëz kjo është arsyeja kryesore pse ata nuk preferojnë ta blejnë një automjet me motor elektrik. Por siç mund ta shohim në shembullin e modelit MG Comet, sot është e mundur të blini një automjet elektrik me një çmim më të ulët se 10 mijë dollarë.
MG Comet është prezantuar në prill në tregun indian dhe është një automjet me përmasa në miniaturë që mund të akomodojë deri në 4 persona. Ajo vjen me një bateri 17.3 kWh e cila, sipas sistemit të certifikimit në Indi, duhet të zgjasë rreth 230 km ndërmjet dy karikimeve. Për të ngarkuar një bateri të tillë në një karikues në shtëpi duhen 7 orë nga 0 në 100 për qind, ndërsa pesë orë për ta karikuar nga 10 në 80 për qind. Automjeti ka sistem të dyfishtë airbag, ABS me frenim automatik në rast nevoje dhe ISOFIX për ulëset e fëmijëve.
Ndërkohë që mësuam informacionin teknik për këtë model muajin e kaluar, tani më në fund e dimë çmimin e saj. Automjeti është i disponueshëm në tri versione, me versionin më të lirë që kushton 9,760 dollarë. Ky është versioni bazë i Comet, për të cilin MG e ka vënë theksin tek tri specifika – brendësinë e zezë, ekranin e informacionit argëtues 7 inç dhe sensorët e parkimit të pasmë. Marrë parasysh faktin që kushton më pak se 10 mijë dollarë, këto opsione duken mjaft të mira.
Për ata që duan akoma më shumë, është versioni Play me një çmim prej 11.350 dollarësh, i cili sjell një dizajn të brendshëm gri, dy ekrane diagonale 10.25 inç (infotainment dhe ekran instrumenti) dhe përveç sensorëve, një kamerë parkimi në pjesën e pasme. Kësaj duhet t’i shtohen Android Auto dhe Apple Car Play, si dhe një sistem special iSmart me opsione për menaxhimin e automjetit, duke përfshirë kontrollin zanor.
Për pak më shumë para (12.200 dollarë), disponohet edhe versioni Plush, i cili përveç opsioneve nga modeli Play, sjell aplikacionin Bluetooth Digital Key për ndarjen e automjetit me përdoruesit e tjerë. Automjeti vjen me 3 vite garanci, kurse garancia e baterisë është 8 vjet, ose 120.000 km./Arena EV
Përgatiti: Nuhi Shala
