'Amazon', 'Google', 'Meta' ndër objektivat e ligjit të BE-së për dezinformim dhe përmbajtje të dëmshme
Ligjvënësit e BE-së e kanë arritur një marrëveshje mbi bazat e legjislacionit kryesor që synon ta trajtojë anën negative të platformave online.
Ligjvënësit në Bashkimin Evropian arritën një marrëveshje të shtunën mbi pikat bazë të legjislacionit kryesor të krijuar për t’i frenuar ndikimet negative nga faqet e mediave sociale dhe platformat e tjera dixhitale.
Akti i Shërbimeve Dixhitale (The Digital Services), DSA ndër të tjera, do t’i detyrojw shërbimet, duke përfshirë ‘Facebook’, ‘Google’, ‘Twitter’ dhe të tjerë, ta ndalojnë përhapjen e dezinformatave në platformat e tyre dhe të zbulojnë se si algoritmet e tyre e rekomandojnë përmbajtjen për përdoruesit.
DSA do t’i ndalojnë gjithashtu disa lloje reklamash në platforma, të tilla si reklamat që i kanë si target fëmijët ose të përshtatura për përkatësinë etnike ose orientimin seksual të njerëzve.
“Me DSA ne ndihmojmë në krijimin e një mjedisi të sigurt dhe të përgjegjshëm në internet,” tha komisionerja evropiane Margrethe Vestager në një deklaratë.
“Platformat duhet të jenë transparente në lidhje me vendimet e tyre për moderimin e përmbajtjes, të parandalojnë dezinformatat e rrezikshme që të bëhen virale dhe të shmangin ofrimin e produkteve të pasigurta në treg. Me marrëveshjen e sotme, ne sigurojmë që platformat të mbajnë përgjegjësi për rreziqet që shërbimet e tyre mund të paraqesin për shoqërinë dhe qytetarët “, ka shtuar ajo
DSA është një nga dy shtyllat e një rishikimi apo rikontrollimi të madh të rregullimit të teknologjisë, i zbuluar për herë të parë në formë drafti nga BE në dhjetor 2020.
Shtylla tjetër, Akti i Tregjeve Dixhitale (Digital Markets Act, DMA) mori miratimin paraprak muajin e kaluar dhe është krijuar për të trajtuar çështje të tilla si sjellja antikonkurruese.
Të dyja aktet ende presin një votim përfundimtar, por ndryshime të mëdha nuk priten.
BE-ja ka miratuar gjithashtu Rregulloren e Përgjithshme të Mbrojtjes së të Dhënave, ose GDPR, e cila është krijuar për t’u dhënë njerëzve më shumë kontroll mbi mbledhjen dhe ndarjen e informacionit të tyre personal.
Evropa ka kohë që ka marrë lidershipin në përpjekjet për ta frenuar teknologjinë e madhe dhe sikurse Akti i Shërbimeve Dixhitale ashtu edhe Akti i Tregjeve Dixhitale mund të ndikojnë në përpjekjet e qeverive në mbarë botën për t’i adresuar problemet rreth platformave kryesore të teknologjisë.
ShBA deri më tani nuk ka miratuar ndonjë ligj gjithëpërfshirës për të trajtuar çështje të tilla.
Sipas DSA, platformat që arrijnë më shumë se 10% të popullsisë së BE-së do t’i nënshtrohen auditimeve të pavarura të hapave që ata po ndërmarrin për ta parandaluar abuzimin e sistemeve të tyre, sipas një përmbledhjeje të postuar nga Komisioni Evropian.
Hapat e tjerë që ligji do të ndërmerrte përfshinin tregjet bindëse në internet për të ndihmuar në identifikimin e shitësve të mallrave të paligjshme dhe vendosjen e mënyrave për përdoruesit për të shënuar mallra, shërbime ose përmbajtje të paligjshme dhe për platformat për të punuar me “kujdestarë të besuar”.
Kompanitë që shkelin ligjin mund të përballen me gjoba prej miliarda dollarësh, si dhe dëmtim të mundshëm të reputacionit të brendeve të tyre.
Kompanitë e mëdha të teknologjisë janë shprehur në favor të mbështetjes së qëllimeve të BE-së, por se specifikat e legjislacionit janë thelbësore.
“Ndërkohë që ligji finalizohet dhe zbatohet, detajet do të kenë rëndësi”, tha një zëdhënës i ‘Google’ në një deklaratë. “Ne presim me padurim të punojmë me politikë bërësit për t’i rregulluar detajet e mbetura teknike për të siguruar që ligji të funksionojë për të gjithë.” Përveç motorit të tij masiv të kërkimit, ‘Google’ zotëron faqen kryesore të videove ‘YouTube’.
‘Twitter’ tha se mezi pret të shqyrtojë DSA në detaje dhe të punojë me BE-në.
“Ne e mbështesim rregulloren e zgjuar dhe të menduarit përpara që balancon nevojën për ta trajtuar dëmin në internet me mbrojtjen e Internetit të Hapur – ndërkohë që kuptojmë gjithashtu se një qasje e vetme që i përshtatet të gjithëve nuk e merr parasysh diversitetin e mjedisit tonë në internet,” deklaroi një zëdhënës përmes ‘Twitter’.
‘TikTok’ tha se po pret gjithashtu detaje mbi legjislacionin.
Kompania e mbështet “qëllimin e BE-së për ta harmonizuar qasjen ndaj çështjeve të përmbajtjes në internet” dhe mirëpret “përqendrimin e DSA në transparencë si një mjet për të treguar llogaridhënie,” tha një zëdhënës i ‘TikTok’ përmes një deklarate.
‘Amazon’ vuri në dukje komentet e bëra qershorin e kaluar nga James Waterworth, drejtori i politikave publike të BE-së.
Waterworth tha se ‘Amazon’ e mbështet DSA duke “prezantuar detyrime të rregulluara për të siguruar që shërbimet të veprojnë kundër përmbajtjes së paligjshme”.
“Por detyrime të tilla duhet të balancohen me kujdes për të ofruar siguri duke lejuar fleksibilitet”, shtoi ai.
‘Facebook’ nuk i’u është përgjigjur një kërkese për ndonjë koment lidhur me legjislacionin e ri të BE-së. /Cnet
