Stacioni i Autobusëve - Foto: KALLXO.com
Stacioni i autobusëve në Gjilan pritet të punojë 24 orë gjatë verës
Komuna e Gjilanit ka njoftuar së gjatë muajve të verës Stacioni i Autobusëve do të jetë i hapur 24 orë pasi që pritet të ketë fluks më të madh të qarkullimit në rrugët e Gjilanit dhe ato regjionale.
Sipas njoftimit, drejtori i Stacionit të Autobusëve, Avni Hajrullahu, ka paraqitur punën që është bërë në këtë ndërmarrje dhe planifikimin për muajt e verës.
“Falë mbështetjes së madhe që e kemi nga Komuna e Gjilanit dhe në bazë të përgatitjeve për sezonin veror, kur fluksi i qarkullimit të autobusëve dhe veturave është i shtuar, Stacioni i Autobusëve do të punoj 24 orë dhe shfrytëzimi i hapësirës së autobusit do të jetë në shërbim të qytetarëve dhe kompanive”, citohet të ketë thënë Hajrullahu.
Ai ka potencuar se edhe në aspektin financiar NPL Stacioni i Autobusëve ka një qëndrueshmëri të kënaqshme dhe që sipas tij, bashkë me operatorët e transportit kanë arritur në 90 për qind të zbatimit të planit.
“Me mbështetje të kryetarit të Komunës Lutfi Haziri kemi koordinuar dhe planifikuar edhe investimet ne rivitalizimin dhe digjitalizimin e Stacionit te Autobusëve, që do ta bëjmë gjatë pjesës së dytë të vitit 2019 dhe kështu viti 2020, stacionin e Gjilanit do ta gjejë me ambiente moderne dhe me standarte europiane”, citohet të ketë thënë ai.
Më tutje, Hajrullahu i ka ftuar të gjithë qytetarët e komunës së Gjilanit që ta shfrytëzojnë transportin publik dhe hapësirat e Stacionit të Autobusëve, sepse “transporti publik është më i sigurt dhe është legal”.