Xhudo: Nora Gjakova fiton medaljen e bronztë në Katar
Pas Distria Krasniqit, e cila e ka fituar medaljen e artë në Katar dhe Majlinda Kelmendit e cila e fitoi medaljen e bronztë, Nora Gjakova ia ka sjellë Kosovës medaljen e tretë.
Nora Gjakova e ka fituar medaljen e bronztë, pasi ka mposhtur me shënim të artë portugezen Telma Monteiron në kategorinë 57 kilogramë.
Gjakova ka çuar në tre numrin e medaljeve të fituara nga ekipi Olimpik i Xhudos në Mastersin e Dohas së Katarit.
Ekipi Olimpik i xhudos e ka nisur vitin me Mastersin e Dohas së Katarit, që ka filluar nga sot dhe do të zgjasë deri më 13 janar.
Pesë garuesit që ndodhen brenda normës Olimpike Tokyo 2020, Majlinda Kelmendi (-52 kg), Distria Krasniqi (-48 kg), Nora Gjakova (-57 kg), Loriana Kuka (-78 kg) dhe Akil Gjakova (-73 kg) do të synojnë ta nisin 2021-tën me medalje dhe njëkohësisht të shtojnë pikë të reja Olimpike, të cilat iu ndihmojnë edhe për renditje më të mirë para Olimpiadës së Tokios.
Në Mastersin e Dohas marrin pjesë vetëm garuesit e renditur në top 36-she në kategori, që tregon se shumica e xhudistëve do të jenë pjesëmarrës edhe në Lojërat Olimpike “Tokio 2020”.
Akilin në tatamin e Dohas do ta shohim nesër përballë Somon Makhmadbekov të Taxhikistanit.
Loriana lufton të mërkurën ndërsa në raundin e parë takohet me Sarah Myriam Mazouz të Gabonit.