Kosova do të merr pjesë me dy skitarë në Lojërat Olimpike Dimërore ‘Llozana 2020’

Ekipi Olimpik i Kosovës, do të marrë pjesë me dy skitarë në Lojërat Olimpike Dimërore për të Rinj, ‘Llozana 2020’.

Lojërat Olimpike Dimërore për të Rinj, do të mbahen prej 9 deri me 22 janar të vitit 2020 në Llozanë të Zvicrës.

Kosovën do ta përfaqësojnë dy skitarët e skijimit alpin: Era Shala dhe Drin Kokaj, të cilët e kanë fituar edhe zyrtarisht të drejtën për të garuar në LOD për të Rinj “Llozana 2020”.

Shala dhe Kokaj, të dy 16-vjeçarë, janë pjesë e Klubit të Skitarisë Prishtina. Ata garojnë në disiplinat sllallom dhe sllallom i madh, në të cilat do të paraqiten edhe në Llozanë.

Kosova do të jetë njëra prej 11 vendeve që do të debutojnë në edicionin e tretë të këtyre Lojërave.

Pjesëmarrës në LOD për të Rinj “Llozana 2020” janë 1880 sportistë, prej tyre 940 meshkuj dhe 940 femra, të gjithë të moshës 15-18 vjeç.