Challandes liron nga grumbullimi katër futbollistët e Prishtinës

Trajneri i Kombëtares së Kosovës, Bernard Challandes e ka pranuar kërkesën e Prishtinës që t’i liroj nga grumbullimi katër futbollistët e kampiones së Kosovës për miqësoret ndaj Guinesë dhe Gambisë.

Gledi Mici, Endrit Krasniqi, Leonit Abazi dhe Lumbardh Dellova ishin ftuar nga Challandes për miqësoret ndaj Guinesë dhe Gambisë, por futbollistët e Prishtinës nuk mund t’i bashkohen “Dardanëve”, pasi duhet të përgatiten për ndeshjet kualifikuese në Ligën e Kampionëve.

“Me kërkesë të FC Prishtina dhe me qëllim të përkrahjes së klubeve tona për paraqitje sa më të mirë në garat evropiane, përzgjedhësi Bernard Challandes ka vendosur të lirojë nga grumbullimi i paraparë me Kombëtaren katër futbollistët e skuadrës kampione të Kosovës, e cila ka nisur përgatitjet për pjesëmarrje në parakualifikueset e Ligës së Kampionëve. Kërkesa e klubit ka ardhur pas publikimit të listës dhe disa ditë pasi FFK ua ka dërguar ftesat Gledi Micit, Endrit Krasniqit, Leonit Abazit dhe Lumbardh Dellovës, për dy miqësoret që do të zhvillohen në Antali kundër Guinesë dhe Gambisë”, thuhet në njoftimin e FFK-së.