Çeku për mos-licencimin e FFK: Nuk ka rrezik të përjashtimit nga UEFA dhe FIFA

Ministri i Kulturës, Rinisë dhe Sportit, Hajrulla Çeku, ka thënë se nuk ka rrezik që Federata e Futbollit të Kosovës (FFK), të përjashtohet nga UEFA dhe FIFA, për shkak të vonesave në licencim në Ministri.

Në një konferencë për media para gazetarëve, Çeku ka thënë se licencimi i FFK-së është në fazën përfundimtare.

Ai ka thënë se si Ministri kanë kërkuar sqarime nga FIFA dhe UEFA, për kriteret ndërkombëtare të licencimit.

“Kemi kërkuar sqarime nga këto asociacione sa i përket kritereve ndërkombëtare për licencim, sapo t’i marrim sqarimet, do të kemi më të lehtë” – tha para gazetarëve, ministri Çeku.

Ai ka ftuar FFK-në dhe klubet që të dorëzojnë aplikacionet.

“FFK ende ka punë dhe e ftojmë që së bashku me klubet t’i dorëzojnë sa më shpejtë aplikacionet” – tha ministri Çeku.

Nëpër media në Kosovë ishte raportuar se FFK-ja rrezikon mos-licencimin në Ministri të Kulturës, Rinisë dhe Sportit, për shkak të disa kritereve, e si rrjedhojë e mos-licencimit klubet e futbollit nuk do të mund të përfitonin nga Ligji i Sponsorizimit në Sport.