Sonte në 'Drejtësia në Kosovë': Skandali në Gjykatën e Drenasit
Hulumtimi i “Drejtësia në Kosovë” ka arritur në përfundimin se punëtorët e kësaj gjykate kanë vendosur t`i injorojnë në plotni rregullat ligjore duke i dhënë vetes luksin që rreth 20 mijë lëndë të cilat kanë arritur në këtë gjykatë mos t`i regjistrojnë fare.
Të gjeturat në terren tregojnë se në Gjykatën e Drenasit mbi 10 mijë lëndë të vitit 2014 stafi përgjegjës i kësaj gjykate nuk i ka regjistruar fare në regjistrat e gjykatës. Pasi janë lënë lëndët e vitit 2014 pa u regjistruar, përgjegjësit e Gjykatës kanë vazhduar me regjistrimin e lëndëve të vitit 2015, pa i regjistruar fare ato të vitit paraprak.
Si rezultat i kësaj, mbi 10 mijë lëndë të kundërvajtjeve në këtë gjykatë janë parashkruar pa u regjistruar, pasi ato lëndë janë lënë në harresë. Kjo gjendje është toleruar edhe në vitin 2016-të. Sipas të gjeturave del se lëndët e vitit 2016-të bashkë me ato të vitit 2014 janë regjistruar në vitin 2017.
Në fund të emisionit “Drejtësia në Kosovë”, mund ta ndiqni rubrikën e rregullt “Policia”, me pamje ekskluzive nga aksionet e policisë në luftën kundër krimit.
Emisioni “Drejtësia në Kosovë” transmetohet çdo të premte në RTK në orën 22:20 dhe repriza të hënën në mesditë.