Foto: Gent Cakaj/Facebook
Solidarizohet me Kosovën, Shqipëria anulon pjesëmarrjen në Samitin e Sarajevës
Ministri për Europën dhe Punët e Jashtme të Shqipërisë, Gent Cakaj ka njoftuar se Shqipëria nuk do të marrë pjesë në samitin e Procesit të Bashkëpunimit të Europës Juglindore (SEECP) organizuar nga Bosnje-Hercegovina.
Ai ka thënë se kjo po bëhet në shenjë solidarizimi për Kosovën.
Cakaj ka kritikuar trajtimin e Kosovës nga organizatorët, të cilin e ka quajtur të papranueshëm.
“Shqipëria anulon pjesëmarrjen e saj në Samitin e SEECP në shenjë solidariteti për Kosovën. Trajtimi i saj nga organizatorët është i papranueshëm dhe shkon kundër qëllimit të krijimit të një atmosfere besimi, marrëdhëniesh të mira fqinjësore dhe stabilitetit”, ka shkruar Cakaj në Twitter.
Ditë më parë presidenti Hashim Thaçi dhe ministri i Jashtëm, Behgjet Pacolli e kanë anuluar pjesëmarrjen në Samitin e Sarajevës për shkak të ftesës denigruese nga kryetari aktual i Bosnjës dhe Hercegovinës.
“Sjellja e Bosnjës dhe Hercegovinës është e papranueshme dhe paradoksale, meqë përfaqësuesit e saj aplikojnë praktika tërësisht antievropiane, që nuk dallojnë me ato të Serbisë. Me një qasje të tillë destruktive, bashkëpunimi rajonal dhe fqinjësia e mirë ndërmjet shteteve të Ballkanit Perëndimor mbetet një parakusht i paarritshëm në rrugën për anëtarësim në BE. Republika e Kosovës mbetet e përkushtuar për fqinjësi të mirë, bashkëpunim rajonal dhe të ardhme euroatlantike, mirëpo nuk pranon të nënshtrohet dhe të diskriminohet nga askush”, tha Thaçi.
?? cancels its participation at SEECP Summit in solidarity with ?? Its treatment by the organisers is unacceptable & goes against the aim of creating an atmosphere of trust, good neighbourly relations & stability. There is no cooperation without equal treatment #westandtogether
— Gent Cakaj (@CakajGent) July 7, 2019