Sindikatat Kërkojnë Zbardhjen e Sulmit ndaj RTK-së
“SPERTK dënon fuqishëm këtë akt të shëmtuar të këtyre personave dashakeq, i cili është i drejtuar ndaj të ardhmes së RTK-së dhe gjithë vendit,” thuhet në reagimin e sindikatës pas sulmit.
Sindikata tregon se si ndodhi sulmi i mbrëmshëm dhe me çka u sulmua RTK-ja.
“Persona të panjohur kanë sulmuar objektin e RTK-së, me granat dore me saktësisht vendin ku janë të vendosur transmetuesit e valëve dhe gjeneratorët rreth orës 22:00. Në kohën kur ka ndodhur ky shpërthim, shumë nga kolegët tanë ishin në vendet e tyre të punës dhe fatmirësisht të gjithë kanë shpëtuar,” vijon reagimi.
Sindikata e Punëtorëve të RTK-së kërkon që të zbulohen kryerësit e sulmit.
“SPERTK kërkon nga organet e hetuesisë, që sa më parë të zbardhin këtë akt qyqarë të drejtuar ndaj mediumit të vetëm publik RTK. SPERTK nuk dëshiron të paragjykoj motivet e këtij sulmi, por i dënon të gjitha sulmet fyerjet, të cilat po bëhen kohës së fundit në adresim të RTK-së,” përfundon reagimi.
Sulmin me bombë e dënoi edhe Sindikata e Pavarur e RTK-së (SPRTK) duke thënë se e rrezikoi jetën e punëtorëve të këtij mediumi
“Sindikata e Pavarur e RTK-së dënon ashpër sulmin kriminal ndaj Transmetuesit Publik RTK, duke vënë në rrezik jetën e të punësuarve të cilët në momentin e sulmit ishin në vendin e tyre të punës,”thuhet në reagim.
Sindikata e Pavarur e RTK-së kërkon që përveç kryerësve të sulmit, të zbulohen edhe orkestruesit e tij.
“SPRTK fton organet e drejtësisë që të marrin masa në zbardhjen e këtij akti të shëmtuar dhe ndaj kryesve dhe orkestruesve të merren masa ligjore,” përfundon reagimi.
KALLXO.com shkroi për sulmin ndaj RTK-së.
http://kallxo.com/shperthim-ne-rtk-shume-police-atje/
