Shtyhet Seanca ndaj Azem Sylës dhe të Tjerëve
Është shtyrë për të enjten seanca kundër Azem Sylës dhe personave tjerë të akuzuar në Rastin “Toka”.
Seanca u shty për mungesë të të akuzuarit Hajrullah Berisha, ndërsa prokurori Danilo Cecarelli po kërkon që për Berishën të lëshohet urdhër-arrest.
Pas kërkesës së prokurorit gjyqtari Arcadiuss Sedek lëshoi urdhër-arrestin dhe shtyu seancën.
Për dallim nga dje kur seanca ndaj Azem Sylës dhe të tjerëve u mbyll me medie me arsyetimin se është një seancë në të cilën do të vendoset se a do të shkohet me shqyrtimin kryesor, sot ajo është e hapur.
http://kallxo.com/mbyllet-per-media-seanca-ne-rastin-e-azem-syles-dhe-te-tjereve/
Dje mbylljen e seancës EULEX-i kur foli për KALLXO.com e arsyetoi me mungesë hapësire.
http://kallxo.com/eulex-rasti-tokat-u-mbyll-per-media-shkaku-hapesires/
Prokuroria Speciale më 25 tetor ngriti dy aktakuza kundër 39 personave të ndryshëm, në mesin e të cilëve është edhe ish-deputeti i PDK-së, Azem Syla.
Aktakuza e parë, e parashtruar nga një prokuror ndërkombëtar i PSRK-së, është ngritur kundër 22 të pandehurve dhe përbëhet prej 46 pikave.
Të pandehurit akuzohen për veprat penale krim i organizuar, pastrim i parave, marrje e mitës, mashtrim i rëndë, mashtrim në detyrë, nxjerrje e vendimeve gjyqësore të kundërligjshme, keqpërdorim i pozitës zyrtare, legalizimi i përmbajtjes së falsifikuar dhe evazion fiskal.
Aktakuza e dytë e ngritur nga i njëjti prokuror akuzon 17 persona për pastrim të parave.
Anëtarët e këtij grupi të organizuar kriminal kanë bashkëpunuar mes vete, secili me rol të caktuar, për t’i privuar Kosovës pronat shoqërore përmes veprimtarive kriminale, duke përfshirë falsifikimin e vendimeve dhe dokumenteve të tjera zyrtare, mashtrimin dhe veprimeve korruptive.
KALLXO.com siguroi edhe aktakuzën prej 264 faqeve ndaj Sylës dhe të tjerëve.
Po ashtu, KALLXO.com ka sjellë pamje ekskluzive nga operacioni për arrestimin e të dyshuarve për rastin e njohur si pronat.
Në mesin e shtëpive të bastisura ishte edhe ajo e tashmë ish-deputetit të PDK-së, Azem Syla.
http://kallxo.com/aksion-gjere-policor-kerkohet-edhe-azem-syla/