Shtatë të vrarë në trazirat në një burg në Guatemala
27.4.2018 - 12:50
Të burgosurit në Guatemala janë përleshur mes vete me armë zjarri dhe thika, duke lënë të vdekur shtatë persona dhe plagosur 25 të tjerë, kanë njoftuar zyrtarët shtetërorë.
Rojeve të burgut u janë dashur orë të tëra për të marrë sërish situatën nën kontroll, në një burg që gjendet 45 kilometra në jug të qytetit Guatemala, ka thënë zëdhënësi i burgjeve, Rudy Esquivel.
Videot e postuara nga mediat lokale tregonin se si familjarët e të burgosurve ishin mbledhur jashtë këtij burgu për të mësuar për fatin e familjarëve të tyre.
Burgjet në Guatemala janë të mbipopulluara dhe sistemi i rehabilitimit të të burgosurve vlerësohet i dobët.
Në korrik të vitit 2016, gjatë një trazire në burgun në Pavov, 14 persona u vranë.