Një qytetar po voton në shkollën Jordan Misja në Tiranë më 25 qershor 2017. Foto: Gent Shkullaku/LSA

Shqiptarët Votojnë për Parlamentin e Ri

Për herë të parë në këto zgjedhje do të votojnë 136 mijë e 239 persona, ndërsa për herë të parë në Shqipëri si pasoje e ligjit të dekriminalizimit, nuk do të kenë të drejtë vote 1 mijë e 367 të dënuar.

Në këto zgjedhje marrin pjesë 18 parti politike, me 2 mijë e 666 kandidatë të regjistruar për deputetë. Në mbarë vendin janë ngritur 5 mijë e 362 qendra votimi, ndërsa zgjedhjet dhe mbarëvajtja e tyre do të vëzhgohen nga 5 mijë e 351 vëzhgues, nga të cilët 896 janë nga misionet vëzhguese ndërkombëtare.

Kryetari i Komisionit Qendror të Zgjedhjeve ka votuar mëngjesin e së dielës në qendrën e votimit tek “Liceu Artistik”, në rrugën e Elbasanit.

Në një prononcim për mediat, Zguri ka bërë thirrje për votim me maturi, ndërsa ka nënvizuar se nga KQZ janë bërë të gjitha hapat për të mundësuar një gjë të tillë.

“Zgjedhjet duhet të jenë të qeta dhe të lira. Ne i kemi bërë të gjitha përpjekjet. Ftoj çdo shqiptar të votojë e të shprehë vullnetin e tij i lirë”, ka thënë Zguri.

Qendrat e votimit do të mbyllen në orën 19:00 të mbrëmjes, orar pas të cilit komisionerët e qendrave të votimit do të mbyllin kutitë me materialet zgjedhore shoqëruar me procesverbalet përkatëse. /21Media