Zëvendësministri lëvdohet tek Haradinaj për punën e antidrogës

Zëvendësministri i Punëve të Brendshme, Abduselami Shkodra ka raportuar se me tre vendime të ndryshme të ministrit të Punëve të Brendshme është emëruar koordinator nacional kundër narkotikëve, koordinator nacional për sigurinë kibernetike si dhe koordinator nacional kundër krimit të organizuar.

Në raportin e tij ai përmend si suksese punën e kryer nga policia në luftimin e drogave ku nënvizon se sasia e drogës së konfiskuar është rritur për 63%.

Zëvendësministri Abduselami Shkodra, në raportin 100 ditor të punës së tij dorëzuar kryeministrit, të cilin e ka siguruar KALLXO.com, thotë se ka realizuar 15 vizita pune, 19 takime pune, 9 pjesëmarrje dhe organizime të konferencave ndërkombëtare dhe 4 vizita pune jashtë vendi.

Sa i përket krimit të organizuar ai ka thënë se ka ngritur në prioritetet më të larta përpjekjet institucionale dhe strategjike në këtë luftë.

“Kam organizuar katër takime pune të Këshillit Kombëtar për zbatimin e strategjisë, në të cilin janë prezantuar zbatimi i objektivave si dhe të arriturat në luftën kundër krimit të organizuar”, ka shkruar Shkodra në raportin e tij.

Shkodra, në raportin e tij 10 faqësh ka deklaruar se lufta kundër narkotikëve është ndër prioritetet kryesore të punës së tij.

Kurse sa i përket luftës kundër krimeve kibernetike, Shkodra ka raportuar se ka udhëhequr procesin e hartimit të koncept dokumentit, si bazë orientuese e politikave dhe mekanizmave kundër krimeve kibernetike.

KËTU mund të lexoni raportin e plotë të zëvendësministrit Abduselami Shkodra.

KALLXO.com do të publikojë raportet e punës së zëvendësministrave.

Raporti i radhës do të jetë për zëvendësministrin Besnik Hoti.

Shkrime të tjera nga dosja e zëvendësministrave:

Zëvendësministrja e Punëve të Jashtme raporton 29 vizita

Anton Berisha i ankohet Haradinajt, Behgjet Pacolli po e favorizon bashkëpartiaken

Zëvendësministri që pushoi në muajin e parë të punës

Zëvendësministri: Kam qenë prezent në konferencën e kryeministrit Haradinaj

Zëvendësministri ndihet komod me karrigen

Zëvendësministri e raporton punë takimin me Ministrin

Zëvendësministri e llogaritë punë pjesmarrjen në tryeza e konferenca

Zëvendësministri: Kam përfaqësuar ministrinë në përurime