Presidenti serb, Aleksandar Vuçiq - Foto: REL

Vuçiq përsërit: Nuk vazhdon dialogu pa u hequr taksa

Presidenti i Serbisë, Aleksandar Vuçiq, përsëriti se nuk do të ketë vazhdim të dialogut me Kosovën, derisa kjo e fundit nuk e tërheq taksën prej 10% mbi prodhimet e importuara nga Serbia dhe Bosnja.

“Ne jemi të gatshëm të bisedojmë në çdo moment. Por, si të bisedojmë kur dikush, 12 vjet pas nënshkrimit të Marrëveshjes për Tregti të Lirë në Europën Qendrore, nuk e zbaton atë që ka nënshkruar? Prej nga t’iu besojmë se nuk do të shkelin çdo marrëveshje tjetër”, tha Vuçiq për mediat serbe.

Sipas tij, Kosova me këtë taksë merr nga një milion euro në ditë nga Serbia.

Më 6 nëntor, Qeveria e Kosovës ka marrë vendim për vendosjen e taksës doganore mbi mallrat e importuara nga Serbia dhe Bosnja e Hercegovina.

Kjo masë nënkupton taksën prej 10% në të gjitha importet me prejardhje nga Serbia dhe Bosnja.

Vuçiq ka paralajmëruar qysh në takimin e fundit me homologun kosovar, Hashim Thaçi, më 8 nëntor në Bruksel, se nuk do të ketë vazhdim të dialogut derisa të jetë në fuqi taksa. (REL)