Veseli mbledh nesër krerët shtetërorë dhe Ekipin Negociator

Pak ditë pas mbajtjes së Samitit të Berlinit, kryeparlamentari Kadri Veseli do t’i mbledhë nesër në një takim krerët shtetërorë.

Pjesë e këtij takimi do të jenë presidenti, Hashim Thaçi, kryeministri, Ramush Haradinaj si dhe Delegacioni Shtetëror i Kosovës për dialogun me Serbinë.

Burime të KALLXO.com brenda kabinetit të kryetarit të Kuvendit, Kadri Veseli e kanë konfirmuar mbajtjen e këtij takimi.

Po ashtu, brenda këtij takimi pritet të diskutohet për Samitin e Berlinit dhe dialogun Kosovë-Serbi.

Samiti i Berlinit u mbajt këtë të hënë, ku nikoqir ishin kancelarja gjermane, Angela Merkel dhe presidenti i Francës, Emmanuel Macron.

Në ditën e mbajtjes së Samitit të Berlinit, kancelarja e Gjermanisë, Angela Merkel, deklaroi se zgjidhja përfundimtare ndërmjet Kosovës dhe Serbisë “nuk duhet të bëhet në dëm të vendeve tjera të rajonit”.

Kurse, presidenti i Francës, Emmanuel Macron tha se duan t’i shqyrtojnë të gjitha mundësitë për të dy shtetet e Ballkanit Perëndimor, duke shtuar se nuk e kanë për qëllim të imponojnë zgjidhje për Beogradin dhe Prishtinën.

Nga ana e tyre, presidenti i Kosovës, Hashim Thaçi dhe kryeministri Ramush Haradinaj ashtu edhe siç pritej nuk lanë pa folur as në këtë takim për kufijtë e Kosovës.