Gjykimi për vrasje
Vëllai i të ndjerës do të dëshmojë në gjykimin e burrit për vrasjen e bashkëshortes
Din Ademaj, nga fshati Trepoviq i Pejës do të dëshmojë në gjykimin e ish-dhëndrit të tij, që po akuzohet se ia ka vrarë motrën.
Kryetari i trupit gjykues Nikollë Komani tregoi se Ademaj do të dëgjohet në gjykatë më 15 korrik
Xhafer Shkodra akuzohet se e kishte vrarë bashkëshorten e tij, Rabe Shkodra me armë nga afërsia.
Aktakuza e Prokurorisë, e rëndon Xhafer Shkodrën për veprën penale të vrasjes së rëndë dhe për armëmbajtje pa leje.
Në seancën e shqyrtimit fillestar, i akuzuari Xhafer Shkodra ishte deklaruar i pafajshëm.
Ai kishte thënë se nuk ka pasur për qëllim ta vrasë gruan e tij dhe se e njëjta ishte vrarë “pa hiri”.
Xhafer Shkodra gjendet në paraburgim që nga data 20 gusht 2018.
Sipas aktakuzës, për shkaqe ende të panjohura derisa i pandehuri Xhafer Shkodra dhe bashkëshortja e tij Rabe Shkodra ishin duke qëndruar në ballkonin e shtëpisë së tyre, i njëjti me një gjuajtje në gjoks në afërsi të drejtpërdrejtë e vret atë.
Aktakuza thotë se i pandehuri pas këtij momenti menjëherë është larguar ndërsa fëmijët e kishin dërguar nënën e tyre në Spitalin Rajonal të Gjakovës.
Ndërkaq komandanti i Policisë së Gjakovës, Kristë Gjokaj kishte thënë se dyshimet e para janë se incidenti është shkaktuar nga burri i saj dhe se janë vetëm dyshime për vrasje aksidentale.
Sipas deklaratave të familjarëve, respektivisht fëmijëve të tyre bashkëshortët kanë jetuar në harmoni dhe nuk kanë pasur probleme në mes vete dhe dyshimet e tyre janë se rasti ka qenë aksidental dhe se nëna e tyre në atë moment ka qenë duke e pastruar armën me të cilën dyshohet se është kryer vepra.
Bashkëshorti i viktimës ishte larguar nga shtëpia dhe më vonë është arrestuar nga policia në lagjen e tij dhe bazuar në deklaratën e tij viktima kishte pasur armën në dorë të cilën ishte duke e pastruar dhe aksidentalisht i ka shkrepur.
https://kallxo.com/vrasja-e-gruas-hetimet-e-prokurorise-zbardhin-vrasje-ne-rastin-qe-policia-e-quajti-aksident/
