Vëllai i Fatmir Limajt afër punësimit të rregullt në Universitetin e Prizrenit
Demir Limaj, vëllai i Kryetarit të Partisë Socialdemokrate, Fatmir Limaj është gati për të marrë kontratë të rregullt me Universitetin e Prizrenit.
Limaj pritet të marrë titullit Profesor Asistent për disa lëndë në fushën e ekonomisë, në Fakultetin Ekonomik të UPZ.
Ai deri më tani ka qenë duke punuar si mësimdhënës i angazhuar në këtë universitet.
KALLXO.com ka siguruar raportin e Komisionit Recensues të universitetit që kanë vlerësuar se Limaj e meriton të zgjidhet në këtë pozitë nga shtatë kandidatët tjerë që kishin konkuruar.
Vendimin e tyre, Komisioni Recensues e ka bazuar në disa aspekte, duke filluar nga grada shkencore e Limajt, Doktor i Shkencave Ekonomike, marrë në Universitetin Europian të Tiranës.
Përvojën e mësimdhënies në Kolegjin Fama dhe në Universitetin e Prizrenit si i angazhuar, punimet shkencore e të tjera.
Ata i kanë përmendur edhe përvojën Menaxheriale në Telekomin e Kosovës, ku vazhdon të punojë Limaj si Drejtor i Shitjes.
Demir Limaj nuk i është përgjigjur thirrjeve të KALLXO.com për koment, deri në publikimin e këtij artikulli.
KALLXO.com ka marrë vesh se raporti që e përzgjedh Limajn për këtë pozitë do të votohet së shpejti në senat.
Universiteti i Prizrenit për KALLXO.com ka bërë të ditur se nuk ka pasur ankesa nga kundërkandidatët për këtë pozitë.
“Rasti në fjalë si dhe rastet tjera do të kalojnë në bazë të procedurave përkatëse të parapara me Statutin e universitetit dhe aktet ligjore dhe nënligjore, përmes Këshillit të Fakultetit dhe Senatit. Për rastin në fjalë nuk ka pasur asnjë ankesë nga konkurrentët në Konkurs”, thuhet në përgjigjen e universitetit.
Ata nuk kanë treguar se prej sa kohësh Limaj punon në universitetin e Prizrenit, si profesor i angazhuar.
“z. Limaj ka qenë i angazhuar edhe në Semestrin e kaluar mësimdhënës në lëndët e këtij fakulteti, ndërkaq ka përvojë të gjatë të mësimdhënies në universitet”, thuhet në përgjigje.
Dyshimet për ndikimin e NISMA Socialdemokrate në Universitetin e Prizrenit
Nisma Socialdemokrate ka një dorë të fortë brenda Universitetit të Prizrenit ‘Ukshin Hoti’.
Kryesuesi i Bordit të këtij universiteti, Bedri Muhadri është anëtar i kësaj partie, ndërsa ky bord në vazhdimësi kishin zgjedhur Ismet Temaj për të qenë në krye të këtij universiteti, pas një procesi problematik të zgjedhjeve.
Një fotografi që tregon Demir Limajn së bashku me kandidatin për rektor të Universitetit të Prizrenit, Ismet Temaj, qarkulloi ditën kur ishte paraparë të bëhet zgjedhja e rektorit.
Temaj më pas u zgjodh rektor me shumicë votash.
KALLXO.com ka shkruar për pasurinë e Demir Limajt.
Gazeta Jeta në Kosovë kishte raportuar dhe analizuar në vazhdimësi procesin e përzgjedhjes së rektorit të Universitetit të Prizrenit dhe ndikimet politike në këtë universitet.
