Tunë e Gjon Kqirës u Kthehet Paraburgimi

Gjykata e Apelit e ka prishur vendimin e Gjykatës Themelore të Prizrenit me të cilin të akuzuarve Tunë e Gjon Kqira iu ndërpre dhe iu zëvendësua me arrest shtëpiak masa e paraburgimit.

Lajmin për KALLXO.com e konfirmoi zëdhënësja e Gjykatës Themelore  në Prizren Afërdita Kicaj.

Sipas zëdhënëses Kicaj, Gjykata e Apelit Tunë e Gjon kqirës ua ka vazhduar masën e paraburgimit për një muaj.

“Po, Gjykata e Apelit ua ka vazhduar për një muaj masën e paraburgimit Tunë dhe Gjon Kqirës. Ata nga masa e arrestit shtëpiak janë kthyer në paraburgim”, tha Kicaj.

Tunë e Gjon Kqira qenë liruar nga paraburgimi më 7 prill në seancën e gjykimit ku bashkë me ta akuzohen edhe Kastriot, Marjan, Gjekson e Gëzim Kqira dhe Benson Buza, Besfort Omaj, Zyrafete Hukolli, Ragip Fazlija, Ekrem Leci, Hil Katinari, Sejdë Kaqorraj e Zef Oroshi.

http://kallxo.com/lirohen-nga-paraburgimi-tune-e-gjon-kqira/

Sipas Prokurorisë Speciale, gjatë disa viteve të kaluara, të pandehurit Tunë, Kastriot, Gjon, Marjan, Gjekson e Gëzim Kqira dhe Benson Buza kanë vepruar si grup i organizuar kriminal më qëllim të përfitimit të drejtpërdrejtë të dobisë financiare, duke kryer vepra të rënda penale.

Sipas aktakuzës, Tunë Kqira i ka mbikëqyrur dhe i ka drejtuar veprimet e këtij grupi kriminal.

Grupi ka shfrytëzuar gjendjen e rëndë financiare ose papërvojën e të dëmtuarve dhe u ka dhënë para me fajde. Pastaj, duke përdorur kërcënimet e rënda, i kanë detyruar të paguajnë kamata dukshëm joproporcionale ose të kryejnë ndonjë veprim tjetër në dëm të pasurisë së tyre.

KALLXO.com e ka ndjekur vazhdimisht këtë proces gjyqësor. Këto shkrime mund t’i lexoni këtu.