Telashet e zëvendësministrit: Mungesa e numrave të telefonave

Zëvendësministri Rexhep Mazrreku, në raportin e tij të punës ka thënë se është angazhuar për të jetësuar programin e tij si zëvendësministër, duke mos e lidhur atë me synimet e qeverisë.

“Ky program i imi i zëvendësministrit të MKRS-së është realizuar me shumë angazhim, përkushtim duke pasur përkrahje të fuqishme nga bashkëpunëtorët e mi tekniko-administrativ”, ka shkruar ai në fillim të raportit të tij të punës për 100 ditët e qeverisjes.

Madje, për realizimin e këtij programi thotë se e kishte edhe një planë të punës, të cilin thotë se e ka realizuar në masën prej 85%.

Mos-realizmin e plotë të planit thotë e kanë penguar disa faktor që nuk kanë qenë në ndikimin e tij.

“Lirisht mund të konstatojë, atë që e kam planifikuar është realizuar mbi 85%, ndërsa pjesa e parealizuar është mbet për shkak të pengesave teknike si dhe mosfunksionimi për më shumë se një mua i ueb-faqeve zyrtare të komunave, mungesa e kryetarëve të disa federatave, mos-përgjigja në një e-mail nga disa komuna për të organizuar takime të përbashkëta, mungesa e numrave të telefonave…”, thuhet në raportin e zëvendësministrit.

Tutje në raportin e tij të punës, ai ka listuar disa takime që ka mbajtur. Në mesin e këtyre takimeve, ishte edhe pjesëmarrja e tij në Turnirin tradicional i Shahut “Kupa Adem Jashari”.

“Në këtë turnir morën pjesë 200 shahist. Në emër të MKRS-së përshëndeta të pranishmit dhe organizatorët si Kryetarin e Federatës së Shahut, Nysret Avidun dhe drejtorin e DKRS-së nga Skenderaj”, thuhet në raportin e tij të punës.

Zëvendësministri i MKRS-së, Rexhep Mazrreku, në raportin 100 ditor të punës së tij, të cilin e ka siguruar KALLXO.com thotë se ka pasur takime me disa federata, atë skitare, të hendbollit, pingpongut, karatesë, atletikës e boksit. Si dhe takime me klube futbolli.

Zëvendësministri, në vend të fotografive nga këto takime, siç ka ndodhur me kolegët e tij, ai i ka futur logot e federatave e klubeve të futbollit. Domethënë në raport janë të përfshira logot e federatave: FSK-së, FHK-së, FPK-së, FK-së, FAK-së, FBOXK-së. Njësoj, në raport janë të bashkangjitura edhe logot e disa klubeve të futbollit.

Të vetmet foto të tij nga takime që ia ka bashkuar raportit nga takimi në komunën e Junikut dhe ai në komunën e Klinës.

KËTU mund të lexoni raportin e plotë të zëvendësministrit Rexhep Mazreku.

KALLXO.com do të publikojë raportet e punës së zëvendësministrave.

Pesë raportet e radhës do të vazhdojnë të publikohen nesër.

Shkrime të tjera nga dosja e zëvendësministrave:

Zëvendësministrja: 104 foto për ta bindur Haradinajn

Ankohet zëvendësministri: Nuk kam komunikim me ministrin

Zëvendësministri: Isha në Novi Pazar e Guci

Zëvendësministri Qazim Rrahmani: Kam zhvilluar një turne nëpër Kosovë

100 ditët e Zëvendësministrit: Ishte tremujor plot ritëm

Raporti i punës: Një memorandum, disa ftesa e agjenda dhe shumë foto

Zëndësministri me katër takime për 100 ditë