Suspendohet kirurgu Numan Baliq pas ngritjes së aktakuzës për ngacmim seksual

Numan Baliqi, ish Ministër i Shëndetësisë i cili punon si kirurg në Spitalin Rajonal të Pejës, është suspenduar nga puna për shkak se ndaj tij është ngritur aktakuzë për ngacmimi seksual.

Lajmin për suspendimin e tij e ka konfirmuar edhe zëdhënësi i Spitalit Rajonal në Pejë, Naim Sahiti.

“Po, është e vërtetë se është suspenduar. Kirurgu është suspenduar nga puna deri me vendim të gjykatës. Ai deri në vendim të Gjykatës, na bazë të ligjit, do të marrë 50 për qind të pagës”, ka thënë Sahiti për KALLXO.com.

Ai ka shtuar se suspendimi i kirurgut Numan Baliq është bërë ditën kur Drejtoria e Spitalit në Pejë është njoftuar nga Prokuroria se ndaj tij është ngritur aktakuzë.

KALLXO.com ka kontaktuar edhe me Prokurorinë Themelore në Pejë në lidhje me rastin e kirurgut Numan Baliq.

Shkodran Nikçi, zëdhënës në Prokurorinë Themelore në Pejën ka thënë për KALLXO.com se Spitali në Pejë ka kërkuar nga Prokuroria informacioone në lidhje me rastin e punonjësit të tyre.

“Lidhur me rastin në fjalë, Prokuroria Themelore e Pejës ka pranuar shkesë zyrtare nga Spitali Rajonal i Pejës, për çka i kemi njoftuar për veprimet e ndërmarra nga ana e prokurorisë rreth punonjësit të këtij spitali”, ka thënë Nikçi për KALLXO.com.

KALLXO.com me datë 1 shkurt ka raportuar se Prokuroria Themelore e Pejës ka ngritur aktakuzë për ngacmim seksual ndaj ish ministrit të shëndetësisë Numan Baliq.

Ish ministri Baliq akuzohet se nga muaji gusht i vitit 2018 në vazhdimësi e ka ngacmuar praktikanten e Spitalit Rajonal të Pejës duke i shkruar mesazhe me përmbajtje ngacmimi në telefon dhe duke i dërguar edhe letra.

Sipas aktakuzës, Baliq i kishte dhënë letra me përmbajtje ngacmimi dëshmitares A.K., për t’ia dërguar praktikantes, letra të cilat më pas i kishte lexuar dhe i kishte grisur viktima.

Me këto Ministri dyshohet se ka kryer veprën penale të “Ngacmimit”.

KALLXO.com, në shtator të vitit 2018 kishte raportuar se ish Ministri ishte paraqitur në prokurori për tu marrë në pyetje në lidhje me këto veprime.

Numan Baliq, në një deklaratë për KALLXO.com, i kishte hedhur poshtë këto akuza duke i quajtur shpifje.

“Është një shpifje, nuk ka asgjë materiale. Dyshoj ne do qarqe politike kundër meje”, kishte thënë Baliq për KALLXO.com.

 

Aktakuzë ndaj ish Ministrit të Shëndetësisë për ngacmim të praktikantes

 

Ish- ministri në prokurori për tentim-dhunimi

.