SMS-të Mbeten si Prova në Rastin Limaj
Kjo ndodhi pasi prokurori përfundoi marrjen në pyetje të ish-kryetarit të Gjilanit, ndërsa kryetarja e trupit gjykues e caktoi më 25 mars vazhdimin e dëshmisë së tij.
Mustafa kërkoi një tjetër datë kur ishte i lirë për t’iu përgjigjur ftesës së gjykatës.
Gjykata pastaj caktoi më 12 e 14 prill seancat e radhës së gjykimit të Fatmir Limajt dhe 4 personave të tjerë.
Edhe pse gjyqtarja në gjykimin e Limajt caktoi të premten si vazhdim të dëshmisë së Mustafës, ai tha se atë ditë është i zënë.
12:01
Kryetarja e trupit gjykues në rastin Limaj kërkoi që të nderohen viktimat e Brukselit.
Ajo propozoi që në orën 12:00 të mbahen dy minuta heshtje për ata që pësuan nga sulmet e djeshme në Bruksel.
Pastaj këta dy minuta heshtje edhe u mbajtën.
11:25
Në seancën e gjykimit të tij dhe 4 personave tjerë Fatmir Limaj i kërkoi prokurorit kryerjen e punës së tij.
Kërkoj nga prokurori që të mos merret me politikë, por ta kryej punën e tij, “ tha Limaj.
Prokurori është duke e marrë në pyetje sot ish-kryetarin e Gjilanit Qemalj Mustafën, në lidhje me disa sms që Mustafa kishte shkëmbyer me ish-biznesmenin Mehmet Shkodra.
Gjatë dëshmisë së djeshme të tij dëshmitari Mustafa e kishte konsideruar Shkodrën militant të PDK-së, parti së cilës i takonte Limaj në kohën për të cilën po akuzohet si ministër i Transportit dhe Telekomunikacionit.
11:05
Në gjykimin e Fatmir Limajt gjykata refuzoi kërkesën e avokatit Tahir Rrecaj për mospranimin e sms-ve si prova.
Bëhej fjalë për sms-të që ish-kryetari i Gjilanit Qemajl Mustafa shkëmbeu me ish-biznesmenin gjilanas Mehmet Shkodra, i cili kërkonte që me anë të Mustafës t’i mundësohej një takim me ish-ministrin e Transportit dhe Telekomunikacionit Fatmir Limaj.
Në njërin nga këta sms, sipas prokurorisë Shkodra i shkruante Mustafës se nëse nuk i mundësohej një takim me Limajn për të folur rreth tenderëve të rrugëve, ai do t’i bënte publike ato që dinte, pas saktësuar çfarë.
Mustafa i përgjigjej po me sms se me këtë që po paralajmëronte të bënte, Shkodra më shumë do t’i prishte punë vetes se sa Limajt.
Tahir Rrecaj, avokati i Fatmir Limajt kishte kërkuar që këta sms të refuzohen si prova, por sot gjykata e refuzoi kërkesën e Rrecajt.
Edhe sot po e vazhdon dëshminë e tij ish-kryetari i Gjilanit Qemajl Mustafa, i cili po merret në pyetje nga prokurori në lidhje me sms-të e shkëmbyer me Mehmet Shkodrën.
Mustafa edhe sot, sikurse dje ka kërkuar që seanca ku po jep dëshminë të mos xhirohet nga mediet.
http://kallxo.com/qemajl-mustafa-ne-gjykimin-e-limajt/
Në këtë proces gjyqësor Fatmir Limaj akuzohet për shpërdorim detyre dhe krim të organizuar. Për të njëjtat vepra ngarkohen edhe Nexhat Krasniqi e Endrit Shala. Pjesë e gjykimit janë edhe Shpëtim Telaku e Florim Zuka.
Limaj këtë aktakuzë që nga EULEX-i quhet e konsoliduar pasi në të janë bashkuar rastet MTPT1 dhe 2 më 30 tetor të vitit të kaluar e cilësoi të ngritur me urdhër politik.
http://kallxo.com/fatmir-limaj-kjo-aktakuze-eshte-ngritur-me-urdher-politik/