SBAShK sërish i reagon ministrisë për kompensimin e orëve të humbura në grevë
Sindikata e Bashkuar e Arsimit, Shkencës dhe Kulturës, ka reaguar ndaj Ministrisë së Arsimit Shkencës dhe Teknologjisë, lidhur me kompensimin e orëve të humbura gjatë grevës.
SBASHK përmes një komunikate thotë se, drejtori i përgjithshëm i Inspektoratit të Arsimit në MASHT, Defrim Gashi ka tentuar që me një shkresë pa titull drejtuar kryetarëve të komunave, drejtorëve të DKA-ve, drejtorëve të shkollave dhe mësimdhënësve, sipas sindikatës, u ka kërkuar që të vënë në zbatim vendimin e ministrit Bytyqi të lidhur me kompensimin e orëve të humbura në grevë.
SBASHK-u e ka quajtur cinik kryeinspektorin e Arsimit.
“Kjo letër pa titull ka edhe pjesë të tjera që nuk kanë të bëjnë asgjë me të vërtetën, as me realitetin e as nuk kanë as edhe një bazë ligjore dhe prandaj ne e këshillojmë miqësisht Kryeinspektorin që të merret me punët që i takojnë e të mos vihet në shërbim të Ministrit dhe vendimit të tij jo ligjor e për të bërë presione shtesë ndaj mësimdhënësve lidhur me orët e humbura në grevë”, thuhet ndër të tjerash në reagim.
Komunikatën e plotë të SBASHK-ut, e gjeni më poshtë:
Kryeinspektori dëshiron t’i hyj në hatër Ministrit
Drejtori i përgjithshëm i Inspektoratit të Arsimit në MASHT,z Defrim Gashi për t’i bërë lajka Ministrit, tenton me një shkresë pa titull drejtuar kryetarëve të komunave, drejtorëve të DKA-ve, drejtorëve të shkollave dhe mësimdhënësve që të vënë në zbatim vendimin e Ministrit Bytyqi të 1 marsit e lidhur me kompensimin e orëve të humbura në grevë, vendim ky i pabazuar ligjërisht dhe i kontestuar e i dërguar nga SBASHK në Gjykatën Themelore në Prishtinë me kërkesën që ai të hedhet poshtë sepse nuk ka bazë ligjore.
Që në hyrje të kësaj letre pa titull, kryeinspektori thotë: “ Kompensimi i orëve të humbura është obligim ligjor e moral”. Me këtë thënie kryeinspektori tenton të krijojë huti dhe ta mashtrojë opinionin sepse nuk tregon se cili ligj na qenka ai që obligon mbajtjen e orëve të humbura në grevë. Një ligj nuk ekziston fare.
Kryeinspektori Gashi shkon tutje duke përmendur Ligjin e Inspektoratit të Arsimit e për të thënë se : “ Në të gjitha veprimet e tij inspektorati vendos në radhë të parë në mbrojtje të interesave të nxënësve dhe studentëve”, por ai pikërisht kështu shkel interesat e nxënësve sepse as nxënësit e as prindërit nuk kanë dhënë pajtim që java të jetë me 6 ditë pune kur ajo është paraparë të jetë pesëditëshe.
Kryeinspektori Gashi me tutje në këtë letër bëhet edhe cinik ngase i jep të drejtë grevës, por pastaj del mbi ligjin dhe me cinizmin e tij thotë:” Realizimi i kërkesave të mësimdhënësve duhet bërë pa dëmtuar interesin e fëmijëve”, e për ta cituar pastaj edhe Kontratën e punës se si nuk duhet shfrytëzuar pozitën e punës për interesa personale. Krejt kjo është deklaratë se koti e Gashit. Grevistët me grevën nuk shfrytëzojnë kurrë pozitën e tyre për interesa personale, por veprojnë sipas ligjit të grevave dhe greva është e drejtë e tyre e garantuar.
Kjo letër pa titull ka edhe pjesë të tjera që nuk kanë të bëjnë asgjë me të vërtetën, as me realitetin e as nuk kanë as edhe një bazë ligjore dhe prandaj ne e këshillojmë miqësisht Kryeinspektorin që të merret me punët që i takojnë e të mos vihet në shërbim të Ministrit dhe vendimit të tij jo ligjor e për të bërë presione shtesë ndaj mësimdhënësve lidhur me orët e humbura në grevë. Kryeinspektori nuk është dashur të hesht kur Ministri me një vendim të ngutshëm e bazuar në tekat e tij bëri suspendim masiv të drejtorëve të departamenteve për të angazhuar të tjerë në këto poste udhëheqëse, vendimi i tij u hodh poshtë nga Komisioni i Pavarur Mbikëqyrës për shërbyesit civilë dhe me siguri tani paguhen nga dy persona për të njëjtin vend të punës. Në MASHT mund të ketë edhe parregullsi të tjera i nderuari Kryeinspektor Gashi dhe duke të parë se ke nisur të angazhohesh për t’i hyrë në hatër Ministrin kanë filluar të na krijohen dyshime se edhe vlerësimi i përformancës që udhëhiqet nga ti mund të jetë jo real, por i diktuar nga Ministri sipas simpative e tekave të tij ndaj mësimdhënësve.
Në fund të këtij reagimi i bëjmë thirrje anëtarësisë që të mos merren me shkresa të tilla pa titull, por të vazhdojnë ta respektojnë vendimin e Këshillit Drejtues të SBASHK-ut, i cili duke u bazuar në vullnetin e të punësuarve në Arsimin Parauniversitar ka vendosur që orët e humbura në grevë mos të zbatohen derisa gjykata nuk sjell vendim meritor për këtë çështje.
SBASHK i bën apel ministrit Bytyqi që ta ndërrojë qasjen ndaj SBASHK dhe të mos vazhdojë me vendime të njëanshme e tendencioze. Ai duhet të mos harrojë se SBASHK-u është zëri i të punësuarve në arsim dhe ky zë do të respektohet gjithmonë. Kujtojmë ministrin Bytyqi se ai për dialog të sinqertë e të vazhdueshëm me SBASHK-un është zotuar edhe në takimin me Drejtoren e përgjithshme të Internacionales Botërore të Arsimit për Evropën, znj. Suzan Flocken, por këtë zotim nuk është duke e mbajtur dhe ne do ta informojmë drejtoren Flocken për këtë.
Prishtinë, 8 mars 2019,
Zyra për informim e SBASHK-ut
