Akademia e Shkencave dhe Arteve te Kosoves Foto: ASHAK

Reagon Gashi pas akuzave të AShAK-ut: Hulumtimi ‘Kriza në Akademi’ është i mbështetur nga ndërkombëtarët

Shkëlzen Gashi, hulumtues i raportit “Kriza në Akademi” ka reaguar ndaj akuzave të Akademisë së Shkencave dhe të Arteve të Kosovës të cilët gjatë ditës së djeshme gjatë raportimit në Komisionin për Arsim, Shkencë, Teknologji, Kulturë, Rini dhe Sport, kanë thënë se organizatat që e kanë bërë këtë hulumtim nuk dihet nga e marrin financimin dhe se hulumtimi i tyrë është i cekët.

Ai përmes një postimi në profilin e tij në Facebook i është përgjigjur AShAK-ut se financimi i këtij hulumtimi është i mbështetur nga Agjencia Zvicerane për Zhvillim dhe Bashkëpunim (SDC) dhe Ministria e Punëve të Jashtme e Danimarkës (DANIDA).

“Gjatë këtij raportimi, një nga përfaqësuesit e AShAK-ut kishte deklaruar se ajo që ua kishte zgjuar kureshtjen ishte se “…kush qëndron mbas atyre dy organizatave joqeveritare, duke marrë parasysh që financimi i tyre për ne është krejt i pa qartë, e edhe hulumtimi i tyre është tejet i cekët”. E para, në fillim të publikimit specifikohet qartë se ky raport është hartuar me mbështetje financiare nga Agjencia Zvicerane për Zhvillim dhe Bashkëpunim (SDC) dhe Ministria e Punëve të Jashtme e Danimarkës (DANIDA). Madje, llogot e këtyre dy donatorëve në publikim, veç sa nuk bërtasin”,  ka shkruar Gashi.

Kurse sa i përket kritikës së AShAK-ut rreth hulumtimit të cekët të kësaj organizate, ai ka kërkuar që Akademia duhet të jap përgjegjësi për disa çështje që janë të ngritura në hulumtim.

Postimi i plotë i tij:

REAGIM (Ndaj raportimit të Akademisë së Shkencave dhe të Arteve të Kosovës në Komisionin për Arsim, Shkencë, Teknologji, Kulturë, Rini dhe Sport të Kuvendit të Kosovës)

Pas publikimit të raportit ‘Kriza në Akademi’, të botuar nga organizata ‘Integra’, me mbështetje financiare nga programi “Promovimi i Shoqërisë Demokratike”, AShAK-u u detyrua të raportojë në Komisionin për Arsim në Kuvendin e Kosovës. Ndonëse ligjërisht AShAK-u është i obliguar t’i raportojë Kuvendit të Kosovës për punën e vet, deri më sot nuk i ka raportuar asnjëherë.

Ligji aktual për AShAK-un është në fuqi që nga janari i vitit 2016, por AShAK-u nuk ka raportuar as në fund të vitit 2016, as në fund të vitit 2017, e nuk do të raportonte as në fund të vitit 2018 po të mos ishte publikimi ‘Kriza në Akademi’.

Prandaj, ky është një sukses, edhe pse raportimi i anëtarëve të AShAK-ut në Komisionin për Arsim të Kuvendit të Kosovës, bazuar në raportimet mediale, linte shumë për të dëshiruar.

Gjatë këtij raportimi, një nga përfaqësuesit e AShAK-ut kishte deklaruar se ajo që ua kishte zgjuar kureshtjen ishte se «…kush qëndron mbas atyre dy organizatave joqeveritare, duke marrë parasysh që financimi i tyre për ne është krejt i pa qartë, e edhe hulumtimi i tyre është tejet i cekët». E para, në fillim të publikimit specifikohet qartë se ky raport është hartuar me mbështetje financiare nga Agjencia Zvicerane për Zhvillim dhe Bashkëpunim (SDC) dhe Ministria e Punëve të Jashtme e Danimarkës (DANIDA). Madje, llogot e këtyre dy donatorëve në publikim, veç sa nuk bërtasin. E dyta, hulumtimi ynë edhe mund të jetë tejet i cekët, por a ka mundësi të përgjigjeni në këto pyetje:

  1. Pse gati të gjitha publikimet i keni të autorëve shqiptarë e në gjuhën shqipe, e gati asnjë publikim në gjuhën angleze?
  2. Pse që dhjetë vjet, ndonëse i keni marrë gati 10 milionë € nga buxheti i Kosovës – shtetit më të varfër në Europë – i keni finalizuar vetëm dy projekte të mëdha: Monografinë «Kosova – vështrim monografik» dhe «Fjalorin Enciklopedik të Kosovës» (për cilësinë e këtyre dy publikimeve herën tjetër)?
  3. Pse të gjitha projektet i keni projekte kombëtare, e për dallim nga akademitë përreth, nuk e keni asnjë projekt ndërkombëtar?
  4. Pse prej 10 milionë € që keni marrë nga Buxheti i Kosovës, rreth 2/3 e këtij buxheti i keni çuar në paga dhe mëditje?
  5. Pse honorari – për anëtarin e rregullt 1.429.54 €, e për anëtarin korrespodent 1.283.34 € – është trefish më shumë sesa i kolegëve tuaj nga vendet përreth, ndonëse Kosova është ndjeshëm më e varfër sesa vendet përreth?
  6. Pse gati 90% e anëtarëve të rregullt të AShAK-ut nuk kanë pasë punime të publikuara në revista akademike ndërkombëtare, ndërkaq angazhime nëpër parti politike kanë pasë më shumë se gjysma e anëtarëve të rregullt të këtij institucioni?
  7. Pse pranoni të udhëhiqeni nga një person i dënuar nga gjykata me 18 muaj burgim me kusht për shpërdorim të detyrës zyrtare?
  8. Pse i pranoni në radhët tuaja të paktën tre plagjiatorë – Nexhat Daci, Sabri Hamiti e Arsim Morina – të akuzuar publikisht nga Musa Limani, nga Sali Bytyçi, e nga Talat Gjinolli, me dëshmi të forta, se veprat e tyre janë plagjiaturë?
  9. Pse faqen zyrtare në internet e keni jofunksionale, të papërditësuar, dhe, mbi të gjitha, vetëm në gjuhën shqipe, e pothuajse asgjë në gjuhën angleze?
  10. Pse prej 13 qëllimeve që ua përcakton ligji, ju e keni realizuar vetëm njërin: përmirësimin e vazhdueshëm të kushteve të punës të anëtarëve të Akademisë?

Gjatë ditës së djeshme,  Myzafere Limani, sekretare shkencore e Akademisë së Shkencave të Kosovës, gjatë raportimit  në Komisionin për Arsim e ka akuzuar organiztën Admovere për hulumtim të cekët dhe se financimi i tyre është i paqartë.

Ajo po ashtu ka thënë se i marrin parasysh vetëm akuzat nga instuticionet e Kosovës.

“Menjëherë pas publikimit të hulumtimit të organizatave joqeveritare janë munduar të kuptojnë se kush qëndron pas tyre. Kush qëndron mbas atyre dy organizatave joqeveritare. Hulumtimi i tyre është tejet i cekët dhe financimi i tyre i paqartë. Akademia e ka për detyrë që t’i marrë parasysh vlerësimet nga akademitë simotra të gjitha. Akademia e Kosovës i kushton rëndësi publikimeve në gjuhën e huaj, posaçërisht në veprat që e pasqyrojnë Kosovën. Akademia është duke punuar në këtë drejtim. Plagjiatura është një prej çështjeve që është ngritë në atë raport. Akademia i merr shumë seriozisht që i vijnë nga institucionet e nivelit të njëjtë. Ne nuk kemi pasë asnjë vërejtje për individë për këtë çështje. Në momentin që do të ketë diçka institucionale Akademia i ka mekanizmat e veta e do të shqyrtohen”, ka thënë ajo.