Rakip Avdyli: Nuk Desha të Destabilizoja Vendin

I dënuari me 10 muaj burg nga Gjykata Themelore në Pejë për shtytje në kryerjen e veprave terroriste u shpreh thellësisht i penduar për veprën e tij teksa para Gjykatës së Apelit kërkoi uljen e dënimit.

Rakipi që në korrik të këtij viti pranoi fajësinë në shqyrtim fillestar, ishte dënuar  me 10 muaj burg pasi që sipas aktakuzës, si përkrahës i organizatës terroriste “ISIS” për disa muaj përmes internetit ka bërë thirrje që në emër të xhihadit të kryhen sulme terroriste kundër Qeverisë së Kosovës dhe ambasadave ndërkombëtare.

Megjithatë, para trupit gjykues, Avdyli u shpreh i penduar për veprimin e tij duke thënë se asnjëherë nuk ishte qëllimi i tij destabilizimi i vendit.

“Unë s’kam pasur asnjëherë qëllim të destabilizoj vendin me deklaratën time, por ka qenë si deklaratë kundër padrejtësive ndaj një gruaje myslimane”, tha Avdyli.

Avokati i Avdylit, Sefer Morina, para gjykatësve të Apelit tha se Gjykata Themelore në Pejë ndonëse e ka shqiptuar dënimin nën minimum ligjor, nuk ka shqiptuar dënim proporcional me rrethanat posaçërisht lehtësuese.

“Gjykatë e nderuar ju ftoj që të keni parasysh shkollimin e ulët të të mbrojturit tim dhe përgjegjësinë tij për të kuptuar veprimin e tij, pasi që ai nuk e ka ditur se po bën vepër penale dhe ka menduar se vetëm po shfrytëzon lirinë e shprehjes”, tha Morina.

Morina gjithashtu si rrethanë lehtësuese që Gjykata e Apelit duhet ta ketë parasysh, përmendi edhe gjendjen e vështirë ekonomike të të akuzuarit duke thënë se as 18 vjet pas luftës nuk ka arritur të ketë një kulm mbi kokë, pasi që shtëpia i ishte djegur në luftë.

Ankesë ndaj vendimit të Gjykatës në Pejë ka bërë edhe prokuroria, por duke kërkuar dënim më të rëndë për Avdylin.

Gjykata e Apelit lidhur me ankesat do të marrë vendim ditëve në vijim.

KALLXO.com e ndoqi në vazhdimësi procesin ndaj Rakip Avdylit.