Qyteti i Serbisë emërton sheshin në emrin e aktivistes nga Srebrenica

Autoritetet serbe në qytetin serb të Novi Pazarit ranë dakord t’i vendosin një sheshi emrin e ish-kryetares së shoqatës “Nënat e Srebrenicës”, Hatixha Mehmedoviq, e cila vdiq në korrik.

Këshilli vendor në Novi Pazar në Serbinë perëndimore ka vendosur të emërtojë një nga sheshet qendrore në qytet sipas kryetares së ndjerë të shoqatës “Nënat e Srebrenicës”, Hatixha Mehmedoviq, njoftuan të martën mediat.

“Ne duam të nderojmë kryetaren e ndjesë të shoqatës “Nënat e Srebrenicës” për heroizmin dhe sakrificën e saj. Është detyra jonë ta kujtojmë atë dhe të gjitha viktimat e pafajshme të gjenocidit të Srebrenicës,” tha kryetari i Novi Pazarit Nihar Bisevaq të hënën, raportoi televizioni N1.

Pritet që mocioni të miratohet nga asambleja lokale në dy ditët e ardhshme.

Autoritetet shpjeguan se duke emërtuar sheshin përpara Qendrës Kulturore të Novi Pazarit, qyteti në rajonin e Sanxhakut me shumicë boshnjake të Serbisë dëshiron të nderojë Mehmedoviqin për trimërinë dhe guximin e saj në luftën e saj për të vërtetën, tha raportimi i N1.

Mehmedoviq, ish-kryetarja e shoqatës “Nënat e Srebrenicës”, e cila përfaqëson familjet e të vrarëve nga forcat serbe të Bosnjës në gjenocidin e Srebrenicës në 1995, vdiq më 22 korrik.

Djemtë dhe burrin e saj u vranë nga forcat serbe të Bosnjës gjatë masakrave të Srebrenicës.

Sipas vendimeve të dhëna nga Gjykata e Hagës dhe gjykata shtetërore e Bosnjës, më shumë se 7,000 burra dhe djem u vranë nga forcat serbe të Bosnjës në gjenocidin e Srebrenicës në korrik të vitit 1995.

Vrasjet masive u pasuan nga një operacion i forcave serbe të Bosnjës që synonte të fshihte krimet në varre masive sekondare dhe të treta.

Gjykata e Hagës dhe gjykatat vendore kanë dënuar 45 persona me 699 vjet burg – plus tre dënime me burgim të përjetshëm – për gjenocid, krime kundër njerëzimit dhe krime të tjera kundër boshnjakëve nga Srebrenica.