Qalaj: Kosova e gatshme të jetë pjesë e Interpolit dhe Europolit

Në ceremoninë për 19 vjetorin e Policisë së Kosovës e cila filloi me një minut heshtje për 19 zyrtarët policorë të cilët kanë rënë në krye të detyrës, drejtori i sapo emëruar i Policisë së Kosovës, Rashit Qalaj ka thënë që Policia e Kosovës është e gatshme të jetë pjesë e Interpolit dhe Europolit.

“Jemi duke punuar ngushtë me autoritetet vendore dhe ato ndërkombëtare si Interpolit dhe Europolit. Mirëpresim ndihmën e tyre në lobim për ne”, ka thënë Qalaj.

Qalaj ka deklaruar se 19 vjetori i Policisë së Kosovës shënon një epokë të rëndësishme për policinë.

“Jemi shumë krenar me parimet me të cilat udhëhiqet PK. Për të arritur këtë vlerë, policia është udhëhequr nga trajtimi i barabartë, respektimi i të drejtave të njeriut, paanshmëria dhe bindjet politike, transparenca”, ka potencuar Qalaj.

Drejtori i PK-së së Kosovës ka theksuar se falë angazhimit të pjesëtarëve të PK-së, kjo e fundit është bërë profesionale.

“Në këtë ditë solemne dua të falënderoj menaxhmentin e policisë, ish drejtorët e policisë dhe çdo pjesëtar të policisë. Më lejoni të ua rikujtoj luftimin e aksidenteve në trafik, kemi ndërmarrë siguri afër shkollave. Në përputhje me strategjinë kemi vazhduar me përkushtim për të bashkëpunuar në bashkësi”, ka thënë Qalaj.

Ai ka potencuar edhe të arriturat e Policisë së Kosovës gjatë këtyre 19 viteve.

“Kemi ndërmarrë aktivitete për krim te organizuar, krime të rënda e korrupsion. Me përkushtim jemi angazhuar në luftimin e krimit kufitar. Kemi zbatuar memorandum mes Policisë së Shqipërisë dhe Kosovës në trafik. I kemi kushtuar rendësi planit të integritetit”, ka deklaruar Qalaj.

Po ashtu Qalaj ka thënë se në asnjë moment nuk do të harrohen 19 zyrtarët policor që humbën jetën në krye të detyrës.

“Ata janë në mendjen dhe zemrat tona”, ka përfunduar Qalaj.