Prokurorja në udhëtim jashtë vendit, shtyhet gjykimi i shënjestruar për liberalizim

Në gjykimin e Arben Bashotës, Sylejman Bajramit e Osman Bajramit, të cilët akuzohen për krim të organizuar, detyrim dhe falsifikim të dokumenteve, seanca e paraparë të mbahej sot është shtyrë për një datë tjetër.

Arsye e shtyrjes së seancës ishte se prokurorja e rastit Merita Bina-Rugova paraprakisht përmes një parashtrese e kishte njoftuar Gjykatën se nuk do të mund të jetë e pranishme pasi që është në një udhëtim jashtë vendit.

Për këtë shkak seanca e planifikuar që të mbahej ditën e sotme është anuluar dhe e njëjta është caktuar për datën 10 tetor.

Në këtë rast Arben Bashota, Osman Bajrami dhe Sylejman Bajrami, po akuzohen për krim të organizuar, detyrim dhe falsifikim të dokumenteve.

Sipas aktakuzës, të akuzuarit nga viti 2004 së bashku me Ruzhdi Shaqirin (i vrarë në gusht të vitit 2014) kanë bërë presion të vazhdueshëm ndaj të dëmtuarve Murat Tërnava, Hysen Shahini dhe Ismet Osmani që ta lirojnë pronën në sipërfaqe prej 10.12.53 hektarë që gjendet në Fushë-Kosovë, rrugës për në Prishtinë.

Sipas aktakuzës së përpiluar nga prokurorja Merita Bina-Rugova, pala e dëmtuar, në këtë rast Murat Tërnava, pronën kontestuese e kishte marrë në shfrytëzim për 10 vjet nga KBI Ndërmarrja Shoqërore “Bujqësia”.

Ky rast është njëri nga rastet e shënjestruara për liberalizim të vizave.

KALLXO.com në vazhdimësi ka raportuar nga ky proces gjyqësor.

Raportimet mund t’i gjeni në këtë link.