Gjykata Themelore në Gjakovë | Foto: KALLXO.com

Prokuroria nuk Çon Askënd në Gjykimin për Kanosjen e Prokurorit

Në Gjykatën Themelore të Gjakovës të hënën ishte planifikuar të mbahej seanca gjyqësore ndaj të akuzuarit Eshref Qafleshi nga Dragashi, për shkak të akuzës për kanosje ndaj prokurorit të shtetit Besim Susuri nga Prizreni.

Seanca gjyqësore nuk u mbajt ngase askush nga Prokuroria e Shtetit nuk u paraqit në gjykatë.

Gjyqtarja e rastit, Ilirjana Hoti, bëri përpjekje të shumta duke thirrur përmes telefonit prokurorët e Prokurorisë Themelore të Gjakovës, mirëpo asnjëri prokuror nuk ishte i lirë.

Ajo, kontaktoi edhe me punëtorin e ndarjes së lëndëve në Prokurorinë Themelore të Gjakovës, nga i cili u njoftua se kjo lëndë nuk gjendet në regjistrat e Prokurorisë së Gjakovës.

Nga ana tjetër, prokurori Besim Susuri me lejen e gjykatës përmes telefonit e konfirmoi se Prokuroria e Prizrenit në muajin shkurt e kishte proceduar këtë lëndë në Gjakovë.

Të pranishëm në gjykatë ishin i akuzuari Eshref Qafleshi dhe i dëmtuari- prokurori Besim Susuri, mirëpo për mungesë të përfaqësuesit të prokurorisë, seanca u shty, duke u caktuar më 5 korrik.

Sipas aktakuzës së prokurorisë, i akuzuari Eshref Qafleshi më 08 qershor 2016 rreth orës 16:00 në Dragash, saktësisht në sallën e Gjykatës Themelore në Dragash, seriozisht e ka kanosur të dëmtuarin- prokurorin e shtetit Besim Susurin.

Kanosja, sipas aktakuzës, ka ndodhur në seancë gjyqësore, në të cilën Eshref Qafleshi ka qenë palë në procedurë në cilësinë e të dëmtuarit.

Gjatë seancës gjyqësore i pandehuri Qafleshi fillimisht kishte përdorur fjalë fyese ndaj prokurorit të shtetit, e më pas e kishte kanosur me fjalët “ki me pa se kush është Eshref Qafleshi”.

Më pas, sipas aktakuzës, Qafleshi pa lejen e askujt kishte ikur nga salla e gjykimit, duke mos respektuar urdhrin e gjykatëses që i kishte thënë të ndalej.

Eshref Qafleshi akuzohet për vepër penale të kanosjes nga neni 185, paragrafi 3 lidhur me paragrafin 1 të Kodit Penal të Republikës së Kosovës, për të cilën parashihet dënim deri në 5 vjet burg.

Qafleshi për këtë rast ka qëndruar në paraburgim nga data 08 qershor 2016 deri më datë 07 korrik 2016.