Prokurori Kërkon Kthimin në Burg të Aktivistëve të VV-së

Prokurori Special, Abdurrahim Islami, është ankuar në Gjykatën e Apelit kundër vendimit të Gjykatës Themelore të Prishtinës për lënien në arrest shtëpiak të 3 aktivistëve të Vetëvendosjes, të dyshuar për sulmin ndaj Kuvendit të Kosovës.

Në një prononcim për KALLXO.com Islami tha se të dyshuarit kanë vepruar si grup dhe secili ka pasur rolin e tij.

“Ne kemi parashtruar ankesë ndaj vendimit për caktimin e masës së sigurisë sepse konsiderojmë se secili i dyshuar ka vepruar në kuadër të grupit, dikush ka vepruar në drejtim të planifikimit dhe organizimit, dikush në sigurimin e mjeteve, por të gjithë kanë vepruar si grup”, tha Islami.

Atdhe Arifi, Egzon Haliti, Astrit Dehari, Petrit Ademi, Adea Batusha dhe Frashër Krasniqi ishin arrestuar pas një aksioni të Policisë së Kosovës më 30 gusht.

http://kallxo.com/publikohen-emrat-e-te-arrestuarve-per-bomben-ne-kuvend/

Ndërsa një ditë më pas, Ademi, Batusha dhe Krasniqi ishin lënë në arrest shtëpiak ndërsa ndaj tre të tjerëve ishte caktuar masa e paraburgimit prej 30 ditësh.

http://kallxo.com/paraburgim-dhe-arrest-shtepiak-per-sulmin-ne-kuvend/

Gjashtë personat ishin arrestuar në kuadër të hetimeve për sulmin e 4 gushtit me mjet shpërthyes kundër Kuvendit të Kosovës.

http://kallxo.com/sulmohet-me-mjet-shperthyes-kuvendi-i-kosoves/