Prishtina në vjeshtë vendosë kamerat e trafikut dhe fillon me dënime automatike

Kryetari i komunës së Prishtinës, Shpend Ahmeti ka reaguar rreth numrit të madh të aksidenteve që kanë ndodhur kohëve të fundit në Kosovë.

Ai ka njoftuar që në vjeshtë në komunën e Prishtinës do të vendosen kamerat e trafikut dhe do të fillojnë dënimet automatike.

“Dënimet do t’i mbledhim me përmbarues dhe jemi përkrahës edhe të politikës që të mos lejohet regjistrimi i veturës me dënime të papaguara nga viti i kaluar”, ka shkruar Ahmeti në Facebook.

Më poshtë mund të lexoni postimin e plotë të kryetarit të Prishtinës, Shpend Ahmeti

Numri i aksidenteve në Kosovë qe një kohë është bërë shqetësues. Shpejtësia e pakontrolluar dhe mospërshtatja ndaj kushteve atmosferike janë shkaqet kryesore që shkruhen në raportet e aksidenteve.

Por, duhet të flasim edhe për politikat publike në Kosovë në lidhje me sigurinë në trafik në vitet e fundit. Ka korelacion të ngushtë në mes të dënimeve në trafik dhe numrit të aksidenteve. Por jo vetëm të shkrimit të dënimeve por pagesave të dënimeve.

Mund t’i shikoni numrin e aksidenteve në kohën kur në zbatim ishte politika e marrjes së patentshoferit deri në pagesë, dhe pas largimit të kësaj politike. Me një vendim të minsitrit të Punëve të Brendshme, Skender Hyseni, për shkak se vlerësohej se ishte kundër të drejtave të njeriut, u hoq marrja e patentshoferit dhe vetëm shkruhej dënimi. Vetëm në Prishtinë, para vendimit dënimet paguheshin mbi 70 për qind në javën e parë pas dënimit, pas vendimit, pagesa ne javën e pare ra nën 5 për qind. Numri i aksidenteve u shtua menjëherë në mënyrë drastike.