Pamje nga takimi i Komisionit për Shëndetësi, Punë dhe Mirëqenie Sociale - Foto: KALLXO.com
Posta më e Mirë se Bankat për Shpërndarjen e ‘Socialit’
Deputeti i Kuvendit të Kosovës, Fikrim Damka, ka paraqitur para Komisionit për Shëndetësi, Punë dhe Mirëqenie Sociale propozimin për shpërndarjen e skemës sociale në një mënyrë më të organizuar dhe duke respektuar edhe të drejtat e qytetarëve për të marrë pagesën kur ata të dëshirojnë.
“Bankat komerciale po ofrojnë një euro e gjysmë të cilën Ministria e Mirëqenies Sociale e paguan për çdo skemë sociale. Posta e Kosovës e ka ofruar çmimin një euro e dhjetë centë. Kjo i bie që Ministria çdo vit do të kursente 63 mijë euro“, tha Damka.
Më tej, ai përmendi përparësitë kryesore të Postës në raport me bankat.
Sipas Damkas, Posta ka rrjetin e shpërndarë në gjithë Kosovën dhe punon shtatë ditë në javë, prej orës 08:00 të mëngjesit deri në orën 21:00.
“Prandaj, kjo do të ishte lehtësi për çdokënd që merr skemë sociale”, tha ai.
Fikrim Damka tha se në vendet e rajonit pensionet shpërndahen në filiale të postave dhe theksoi se një gjë e tillë duhet të ndodhë edhe në Kosovë.
Për këtë arsye, ai propozoi që të bëhet një debat me ministrin e Punës dhe Mirëqenies Sociale dhe me ministrin e Financave dhe se në një debat të tillë do të duhej të ftohej edhe Posta e Kosovës, “në mënyrë që të dëgjohen të gjitha palët”.
Të gjithë anëtarët e Komisionit u pajtuan parimisht me këtë propozim.
Kryetarja e Komisionit, Flora Brovina, tha se është jodinjitoze për të gjithë e jo vetëm për ata që presin para bankave për të marrë paratë.
Besa Baftiu nga Lëvizja Vetëvendosje tha se është shqetësuese të shihen qytetarët duke pritur ashtu.
“Kjo është e mirëseardhur për qytetarët. Atëherë na mbetet neve që ta përkrahim dhe ta iniciojmë, t’i thërrasim ministrat dhe kjo të zgjidhet në të mirë të qytetarëve”, tha ajo.