Tribunali i Ri Inicion Rastet e Para në Vitin 2015

Gjykata speciale me seli në Holandë do t’i iniciojë rastet e para vitin e ardhshëm kundër ish luftëtarëve të Ushtrisë Çlirimtare të Kosovës në akuzat eventuale për për vrasje, deportime dhe rrëmbime të serbëve gjatë kohës së luftës.

“Presim që gjykata të jetë plotësisht funksionale në fillim të vitit tjetër. Në bankën e të akuzuarve do të gjenden disa ish pjesëtarë të Ushtrisë Çlirimtare të Kosovës,” deklaroi një diplomat i lartë i BE-së për BIRN.

Aktakuza do të ngritën për vrasjet, rrëmbimet dhe deportimin e serbëve të Kosovës të cilët ishin mbajtur në burg në shumë kampe të paraburgimit të UÇK-së në Kosovë gjatë luftës 1999 dhe të cilët pastaj ishin transferuar në Shqipëri, tha diplomati në kushte anonimiteti.

Lajmet rrodhën pasi Clint Williamson, hetuesi kryesor i Task Forcës për Hetime Speciale të mbështetur nga BE e cila po hetonte akuzat për trafikim organesh nga ushtarët e UÇK-së ka vizituar Prishtinën dhe Beogradin gjatë kësaj jave.

Williamson pritet ta paraqesë raportin e tij javën që vjen lidhur me pretendimet se ushtarët e UÇK-së kishin nxjerrë organet të burgosurve serbë dhe të tjerëve gjatë luftës – akuza këto që dolën nga raporti kontrovers i raportuesit të Këshillit të Evropës Dik Marti në vitin 2010.

Diplomati i BE-së tha për BIRN se task forca ka hasur në vështirësi që të ngritë akuzën ndaj ish zyrtarëve të lartë të UÇK-së që kishin përgjegjësi komanduese për krimet sepse guerrilla nuk kishin urdhëresa me shkrim siç kanë ushtritë e rregullta dhe nuk kishte dokumente për të dëshmuar krimet e kryera.

Mediat lokale spekulojnë se Thaci nuk do të akuzohet edhe pse kjo nuk u konfirmua në mënyrë të pavarur.

Shumica e aktakuzave të reja do të bazohen në materialet e hetimeve të mëhershme të kryera nga misioni i BE-së dhe OKB-së në Kosovë por edhe nga dëshmitë e viktimave dhe të afërmve të tyre.

Gjatë vizitës së tij në Kosovë dhe Serbi, Williamson nuk shpalosi të gjeturat e tij para prezantimit të raportit të task forcës javën që vjen.

“Ambasadori Williamson tha se është i vetëdijshëm për spekulimet për të gjeturat e task forces, por ai theksoi se nuk nuk do të shpaloset asnjë informatë lidhur me të gjeturat e hetimeve deri në prezantimin e tyre, prandaj nuk duhet paragjykuar asnjë rezultat,” u tha në deklaratën e zyrës së tij të lëshuar të marten.

Në prill Kuvendi i Kosovës kishte miratuar themelimin e gjykatës së re speciale e cila do të hetojë akuzat e publikuara në raportin e Williamsonit.

Bashkimi Evropian tashmë ka kërkuar nga qeveria holandeze që ta ndihmojë task forcën në procedurën penale pasi të kompletohen hetimet në akuzat për trafikim organesh.

Edhe pse gjykata e re special do të jetë e vendosur në Holandë, prokurorët dhe gjyqtarët ndërkombtarë do të operojnë sipas ligjeve të Kosovës.