Policia Gjen Marijuanë Në Shkollë, Arreston Një Nxënës
Një sasi e marijuanës është gjetur te një nxënës i Shkollës së mesme Profesionale të Suharekës, të mërkurën.
Policia e Anti drogës, pasi që ka marrë informata se në këtë shkollë është duke u përdorur marijuanë, ka bastisur shkollën dhe te një nxënës ka gjetur një sasi të marijuanës.
Policia në fillim ka arrestuar dy nxënës të kësaj shkolle, por njëri është liruar me njëherë, pasi nuk ka pasur të bëjë me rastin.
Ndërsa nxënësit të cilit i është gjetur marijuana në çantë, është arrestuar dhe me urdhër të prokurorit është ndaluar.
Po ashtu me urdhër të prokurorit është bastisur edhe shtëpia e këtij nxënësi.
KALLXO.com ka kontaktuar drejtorin e kësaj shkolle, Reshit Makica, i cili e pranoi se në këtë shkollë është arrestuar një nxënës, për shkak si është gjetur një sasi e marijuanës.
Ai tha se sot ka marrë vendim që nxënësi të suspendohet prej shkollës.
“Pasi që i njëjti është arrestuar nga policia për përdorim të marijuanës, ne konfom ligjit sot kemi marrë vendim që nxënësi të suspendohet nga shkolla”, tha drejtori i kësaj shkolle.
