Paralajmërimi i Adonis Tahirit për kompanitë që ndotin rrugët
Drejtori i Inspeksionit, Adonis Tahiri ka bërë të ditur se kompania e pastrimit të rrugëve është detyruar të pastrojë rrugën të cilën e kishin ndotur makineritë e veta në një lagje të Prishtinës.
Tahiri përmes një postimi në ‘Facebook’ i bënë thirrje të gjitha kompanive që ta shtojnë kujdesin, sepse gjobat do të jenë të larta.
“Në prani të inspektorëve kujdestarë, kompania detyrohet ta pastrojë rrugën të cilën e kishin ndotur makineritë e veta. Tash që po i afrohemi sezonës së ndërtimeve, iu bëjmë thirrje të gjitha kompanive që ta shtojnë kujdesin, sepse gjobat do të jenë të larta”, ka shkruar drejtori i Inpeksionit të Komunës së Prishtinës.
Prishtina është stërndotur muajve të fundit nga mbeturinat.
Fotografi të shkrepura nga qytetarët dhe gazetarët e KALLXO.com, tregojnë se shumë lagje të Prishtinës janë mbuluar nga mbeturinat.
Mbeturina të hedhura në hapësira të gjelbëruara, mbeturina të hedhura jashtë kontejnerëve janë fotografuar në javën që po e lëmë pas.
Kjo i jep një pamje të shëmtuar kryeqytetit. Përveç pamjes së shëmtuar këto mbeturina të hedhura kudo, vend e pa vend paraqesin edhe rrezik për shëndetin e qytetarëve, pasi që krijojnë ndotje në ambient.
Lidhur me bërllokun në kryeqytet dhe planet për ta menaxhuar, komuna e Prishtinës nuk ka ofruar përgjigje për KALLXO.com.
Ditë më parë gazetarja Deborah Huso shkroi një artikull për BBC-në, pas vizitës dy ditore të saj në Prishtinë, ku ngriti pyetjen se a është Prishtina kryeqyteti më i shëmtuar në botë sa i përket ndërtesave dhe arkitekturës, ndërsa bërlloku në anën tjetër është një problem tjetër që po vazhdon ta shëmtojë kryeqytetin.
Kurse KALLXO.com ju sjell fotot e bërllokut të bëra gjatë kësaj jave në pjesë të ndryshme të Prishtinës.