Pal Lekaj në Viti, Prezanton Projektet për Këtë Komunë

Kryetari i Komunës së Vitisë, Sokol Haliti dhe Ministri i Infrastrukturës, Pal Lekaj kanë nënshkruar memorandum mirëkuptimi përmes të cilit priten të realizohen projekte të shumta në infrastrukturën rrugore.

Gjatë këtij takimi është biseduar edhe për kyçjen e qytetarëve të Vitisë në autostradën “Arbën Xhaferi” përmes fshatit Gërlicë dhe u potencua se për këtë çështje ka një vendim ndërministror të marrë nga ish-qeveria e Republikës së Kosovës, në krye me Isa Mustafa.

Pal Lekaj, Ministër i Infrastrukturës së Republikës së Kosovës, tha se me nënshkrimin e këtij memorandumi të bashkëpunimit nga të dyja palët do të ketë impakt pozitiv për qytetarët por edhe për zhvillimin ekonomik të vendit.

“Ne si Ministri e Infrastrukturës dhe si Qeveri e Kosovës, do të jemi mbështetës të fuqishëm të gjitha komunave të Kosovës, në veçanti të kësaj ane sepse ne mendojmë që kjo pjesë meriton më shumë të zhvillohet në infrastrukturë rrugore por edhe në segmente të tjera që janë vitale për qytetarët”, është shprehur Lekaj sipas njoftimit të Komunës së Vitisë.

Ai shtoi se “po vijnë ditë të mira” për këtë anë pasi që, sipas tij, është koha që të përfundohet e gjithë infrastruktura. Ai shtoi se kryetari Haliti do ta këtë mbështetjen e fuqishëm për zhvillimin infrastrukturor nga kjo ministri dhe nga qeveria e Kosovës.

Pas këtij takimi kryetari i Vitisë, Sokol Haliti, tha se ai ndihet i nderuar me vizitën e Ministrit Lekaj, duke e cilësuar këtë takim si të frytshëm dhe në interes të qytetarëve të Vitisë, pasi që është nënshkruar memorandumi i bashkëpunimit në mes të dy institucioneve.

“Me të vërtetë jemi të nderuar që sot në vizitë e kemi Ministrin e Infrastrukturës, Pal Lekaj me bashkëpunëtorët e tij. Vërtetë ky takim ka qenë shumë i frytshëm, pasi që sot gjithashtu kemi nënshkruar edhe një memorandum bashkëpunimi dhe atë për shumë projekte të cilat do të realizohen në Komunën e Vitisë, në sferën e infrastrukturës të cilat janë në vazhdim e sipër”, u shpreh kryetari Haliti.

Ai tha se beson se Ministri Lekaj dhe kabineti i tij do ta ndihmojnë këtë komunë, në mbulimin e deficiteve në projekte infrastrukturore duke shtuar se ato do të përfundohen siç duhet dhe atë në të mirën e qytetarëve të Vitisë.

Gjithashtu u bë me dije se në këtë takim kryetari Haliti dhe ministri Lekaj, kanë biseduar edhe për nevojat e tjera që ka kjo komunë.

E me këtë rast kryetari Haliti, shtoi se komuna e Vitisë, është një nga komunat në regjion që ka ende nevojë për investime në infrastrukturë. Megjithatë kryetari Haliti tha se gjatë këtij takimi, ata janë pajtuar që të financohen edhe projekte të tjera si: lidhja e Vitisë me 12 fshatra, si dy Sllatinat, Trestenikun, rrugën alternative për Stubëll të Epërme që do të lidhë këtë lokalitet me Vitinë dhe me fshatin Stanqiq si dhe lidhjen e Gjilanit me Kumanovën e Republikës së Maqedonisë.

Në takimin e sotëm ata kanë biseduar edhe për projekte të tjera infrastrukturore si në grykën e fshatit Letnicë, rrugën që lidhë me Kaçanikun e vjetër dhe me këtë rast Kryetari Haliti shtoi se kto rrugë janë edhe në interes të eko-turizmit.

I pyetur nga gazetarët lidhur kyçjen e qytetarëve Vitias në autostradën “Arbën Xhaferi” përmes fshatit Gërlicë, Ministri Lekaj, potencoi se është e drejtë që kryetari Haliti por edhe qytetarët e Vitisë të kërkojnë kyçjen në këtë autostradë përmes fshatit Gërlicë duke thënë se do të marrin një vendim në favor të kësaj ane.

Ai shtoi se për këtë çështje ata kanë edhe një vendim ndërministror të marrë nga ish – qeveria e Republikës së Kosovës, në krye me Isa Mustafën duke shtuar se nëse është e ligjshme ata do ta trajtojnë atë.