Foto: Ilustrim
OSHP ia Anulon një Tender Komunës së Lipjanit
Organi Shqyrtues i Prokurimit (OSHP) ka marrë vendim që të anulojë aktivitetin e prokurimit “Mirëmbajtja dhe servisimi i automjeteve të institucioneve komunale”.
OSHP-ja po ashtu ka urdhëruar Komunën e Lipjanit që procedurën e prokurimit për mirëmbajtjen e automjeteve komunale ta kthejë në rivlerësim.
Komuna e Lipjanit më 15 shkurt 2016 kishte publikuar njoftimin për kontratë lidhur me aktivitetet e prokurimit “Mirëmbajtja dhe servisimi i automjeteve të institucioneve komunale”.
Si kriter për dhënien e kontratës ka qenë tenderi i përgjegjshëm me çmimin më të ulët.
Kundër njoftimit të Komunës së Lipjanit kishte paraqitur ankesë operatori DPZ “Suzuki”, nga Fushë-Kosova, në afatin e paraparë.
OSHP-ja pas pranimit të ankesës kishte caktuar ekspertin shqyrtues, i cili e kishte shqyrtuar ankesën duke rekomanduar që të anulohet njoftimi për dhënie të kontratës dhe lënda të kthehet në rivlerësim.
Eksperti shqyrtues në raportin e tij thekson se operatorit ekonomik i rekomanduar për kontratë i mungojnë çmimet për disa pozicione dhe si i tillë është i papërgjegjshëm.
Me raportin e ekspertit është pajtuar operatori DPZ ”Suzuki”, ndërsa Komuna e Lipjanit është pajtuar pjesërisht.
Përfaqësuesi i Komunës së Lipjanit, Adem Duriqi, ka thënë se ne kemi menduar se i njëjti (DPZ “Suzuki”) ka hequr dorë nga ankesa dhe si të tillë e kemi shpallur fitues operatorin “Beka”.
Vendimin për anulimin e tenderit nga OSHP mund ta gjeni këtu.