Foto: Urim Krasniqi/KALLXO.com
Organizatat e shoqërisë civile e quajnë "të motivuar politikisht" vendimin për shkarkimin e Valdete Dakës
Organizatat e shoqërisë civile kanë kundërshtuar shkarkimin e kryetares së Komisionit Qendror të Zgjedhjeve, Valdete Daka, nga presidentja e vendit, Vjosa Osmani Sadriu.
Përmes një komunikate për media këto organizata e kanë konsideruar vendimin si të motivuar politikisht dhe vlerësojnë se argumentet e dhëna janë të pabazuara.
“Bazuar në vendimin për shkarkim, ne vlerësojmë që argumentet e shtruara nga Presidentja janë të pabazuara dhe paraqesin keqinterpretim të situatave përkatëse. Mes tjerash, kryetares së KQZ-së i atribuohen ekskluzivisht të gjitha përgjegjësitë dhe dështimet e supozuara të KQZ-së, përkundër faktit që Kryetarja e KQZ-së është vetëm një nga njëmbëdhjetë anëtarët me të drejtë vote. Madje, rikujtojmë që puna e KQZ-së është vlerësuar pozitivisht nga raportet vendore dhe ato ndërkombëtare të vëzhgimit të zgjedhjeve”, thuhet në reagim.
Tutje, këto organizata kanë thënë se një vendim i tillë në prag të shpalljes së datës së zgjedhjeve lokale përbënë ndikim të drejtpërdrejtë në pavarësinë, integritetin dhe mbarëvajtjen e punës së KQZ-së.
Reagimi i plotë:
Komunikatë për Media
Prishtinë, 14 qershor, 2021
Organizatat e shoqërisë civile kundërshtojnë shkarkimin e Kryetares së KQZ-së
Ne organizatat e poshtëshënuara të shoqërisë civile, kundërshtojmë vendimin e Presidentes së vendit, Vjosa Osmani-Sadriu, për shkarkimin e kryetares së KQZ-së, Valdete Daka. Ky vendim konsiderojmë se është i motivuar politikisht, si rezultat i ndërrimit të pushtetit në Kosovë pas zgjedhjeve të fundit.
Bazuar në vendimin për shkarkim, ne vlerësojmë që argumentet e shtruara nga Presidentja janë të pabazuara dhe paraqesin keqinterpretim të situatave përkatëse. Mes tjerash, kryetares së KQZ-së i atribuohen ekskluzivisht të gjitha përgjegjësitë dhe dështimet e supozuara të KQZ-së, përkundër faktit që Kryetarja e KQZ-së është vetëm një nga njëmbëdhjetë anëtarët me të drejtë vote. Madje, rikujtojmë që puna e KQZ-së është vlerësuar pozitivisht nga raportet vendore dhe ato ndërkombëtare të vëzhgimit të zgjedhjeve.
Gjithashtu, marrja e këtij vendimi në prag të shpalljes së datës së zgjedhjeve lokale përbën ndikim të drejtpërdrejtë në pavarësinë, integritetin dhe mbarëvajtjen e punës së KQZ-së në organizimin dhe administrimin e atyre zgjedhjeve.
Demokracia për Zhvillim (D4D)
Demokracia Plus (D+)
INDEP
INPO
Instituti Demokratik i Kosovës (KDI)
Instituti i Kosovës për Drejtësi (IKD)
Instituti i Prishtinës për Studime Politike (PIPS)
Lëvizja FOL
Organizata Nënë Tereza
Organizata Çohu
Syri i Vizionit
Sot, Kryetarja e Komisionit Qendror Zgjedhor (KQZ), Valdete Daka është shkarkuar nga kjo pozitë.
KALLXO.com ka siguruar vendimin e Presidencës të nënshkruar nga presidentja Vjosa Osmani.
Në vendim thuhet se Zyra e Presidentes i ka dërguar vendim ish-kryetares së KQZ Valdete Daka me të cilin thuhet se i ndërpritet mandati si kryesuese e Komisionit Qendror të Zgjedhjeve.
Ndërkaq, vetëm pak orë pas shkarkimit të Valdete Dakës nga pozita e kryetares së KQZ-së, Presidentja Vjosa Osmani ka emëruar kryetarin e ri të këtij komisioni, Kreshnik Radoniqi.
Emërtohet kryetari i ri i KQZ-së pas shkarkimit të Valdete Dakës