Foto-ilustrim

Nis gjykimi për grabitjen e rreth 230 mijë eurove në Pejë

Në një skemë të grabitjes që ndodhi në fund të vitit 2016 në Pejë, hajnat i morën një qytetari para në vlerë prej më shumë se 223 mijë euro.

Katër persona të përgatitur mirë kishin arritur t’ia marrin Gazmend Gashit të gjitha paratë që kishte mbledhur gjatë gjithë jetës së tij.

Mënyra se si kanë arritur t’i marrin këto para është jo e zakonshme, pasi katër grabitësit të cilët ia kishin vënë syrin çelësave të këmbimores “Te Gazi” dhe kishin hipur mbi kulmin e shtëpisë së viktimës duke e pritur me qëllim që t’i hidhen sipër.

Kështu edhe kishte ndodhur.

Me t’u afruar te dera e shtëpisë, grabitësit ishin hedhur nga kulmi i shtëpisë mbi Gazmend Gashin duke bërtitur me fjalët “Policia, Policia”.

Në një aktakuzë të ngritur për këtë rast, Prokuroria në Pejë tregon detaje se si kishte ndodhur kjo grabitje.

Sipas aktakuzës së Prokurorisë, pasi grabitësit e kanë shtrirë përtokë, e kishin tërhequr zvarrë viktimën deri në dhomën e pritjes.

Më pas ia kishin lidhur gojën dhe duart dhe me anë të goditjeve e kishin detyruar që të tregojë se ku e kishte fshehur çelësin e këmbimores nga e cila më pas ia kishin marrë të gjitha paratë.

https://kallxo.com/prokuroria-tregon-si-iu-grabiten-pejanit-rreth-230-mije-euro/

Lidhur me këtë grabitje, Prokuroria për momentin e e ka drejtuar gishtin kah një person, Skifter Beqiraj.

Beqiraj akuzohet pasi e kanë lidhur viktimën, me skalper ia ka prerë xhaketën të cilën e kishte veshur viktima dhe në xhepin e brendshëm të saj ia kishte gjetur çelësat të cilët më pas ia kishte dorëzuar njërit prej bashkëkryesve.

Njëri nga anëtarët e grupit, me çelësa në dorë kishte shkuar te këmbimorja “Te Gazi” dhe kishte arritur t’i marrë paratë në valuta të ndryshme, në vlerë mbi 223 mijë euro.

Por, Beqiraj në deklaratat paraprake në Prokurori ka mohuar të ketë kryer veprën e tillë.

Aktakuza specifikon se grabitësit arritën t’ia marrin Gazmend Gashit 146,490.00 franga zvicerane, 27,433.00 dollarë amerikanë, 52,090.00 euro, 1,237.23 euro në valuta të ndryshme, mbi 200,000 lekë si dhe ari në vlerë prej 15,000.00 euro.

Për këto akuza, nesër në Pejë pritet që të fillojë gjykimi ndaj Skifter Beqirajt.

Gjykimi ishte paraparë të fillonte javë më parë, mirëpo për shkak të kushteve atmosferike Shërbimi Korrektues nuk kishte arritur ta dërgonte të akuzuarin në Gjykatë.

Do NOT follow this link or you will be banned from the site!