Arkiv - Kryetari i komunës së Istogut, Haki Rugova, në gjyq. Foto: Kallxo.com

Nënkryetari i LDK-së deklarohet para Gjykatës rreth fajësisë mbi akuzat për konflikt interesi

Nënkryetari i LDK-së, Haki Rugova është deklaruar i pafajshëm para Gjykatës për akuzën “konflikt interesi”.

Këtë për KALLXO.com, e konfirmoi zëdhënësja për informim në Gjykatën Themelore në Pejë, Tringa Zhuti.

“I pandehuri nuk e ka pranuar fajësinë për veprën penale për të cilët akuzohet dhe të njëjtit i është dhënë afati prej 30 ditësh për paraqitjen e kërkesës për hedhjen e aktakuzës”, tha Zhuti.

Akuza për “Konflikt Interesi”, ndaj të parit të Istogut Haki Rugova erdhi pasi Agjencia Kundër Korrupsionit kishte paraqitur kallëzim penal ndaj tij, kjo pas raportimit të marrë nga BIRN dhe Internews Kosova.

“Agjencia Kundër Korrupsionit më 11 gusht 2017, ka pranuar informacionin nga Rrjeti Ballkanik i Gazetarisë Hulumtuese ‘BIRN’ dhe ‘Internews Kosova’ kundër Haki Rugova për shkak të mundësisë së veprës penale: konflikt i interesit”, thuhet në arsyetimin e kallëzimit penal të Agjencisë.

Ai dyshohet se më 1 gusht 2014 në cilësinë e kryetarit të Komunës së Istogut me dashje ka marrë pjesë personalisht në nënshkrimin e kontratës ‘Ndërtimi i Kanalizimit Fekal në Fshatin Cerrcë-Lubozhdë- Faza e Parë”.

Tenderin për ndërtimin e këtij kanalizimi e fitoi “’MA-CON’ sh.p.k, në pronësi të Gani Rugovës [Vëllai i Haki Rugovës], në vlerë prej 289,119.85 euro, kështu duke mundësuar interes financiar për të [Haki Rugovën] dhe personin juridik që ka të bëjë me të”.

Më poshtë mund të gjeni Hulumtimin e Drejtësia në Kosovë, në lidhje me ketë rast.

 

Hulumtim: Komuna e Familjes Rugova

.