Narthin Asamblistët e Suharekës

Anëtarët e Asamblesë Komunale të Suharekës u ankuan për kushte të papërshtatshme të punës.

Prandaj, nga kryesuesi i Asamblesë ata kërkuan plotësimin e një varg kushtesh. Kushti kryesor ishte që në seancën e radhës të ketë ngrohje.

Shqetësimet dhe kërkesat në emër të kolegëve të tij i bëri Shefket Kolgeci, asamblist nga radhët e LDK-së.

“Në emër të grupit dhe ankesa e të gjithëve është se ambienti nuk është i përshtatshëm, është ftoftë, nuk është shumë ftoftë, por i papërshtatshëm. Sot kërkojmë që në mbledhjen e ardhshme të sigurohet ngrohja. Njëherit kërkojmë edhe një gardërobë, sepse nuk po kemi ku t’i vendosim palltot. Gjithashtu kërkojmë edhe mikrofona, ose një, ose për secilin ulëse”, tha Kolgeci.

Në mbledhjen e së hënës në rend dite ishin disa pika. Ajo që nxiti debat ishte këmbimi i pronës private me pronë publike të një qytetari, i cili kishte dhënë pronën e tij për zgjerimin e rrugës.

Disa asamblistë u ankuan për vlerësim jo të mirë të Komunës karshi qytetarit e disa të tjerë ishin kundër procedurës se si ishte shpronësuar kjo rrugë.

Kur erdhi pika e rendit të ditës për pyetje të ndryshme, grupi i asamblistëve të PDK-së e lëshoi mbledhjen për shkak të mungesës së kryetarit të Komunës dhe drejtorëve të drejtorive.

Alush Shala, shef i grupit të asamblistëve, tha se nëse prapë mungojnë kryetari dhe drejtorët nuk do të marrin pjese më në Asamble.

Veprimin e udhëheqësve të Komunës Shala e quajti mungesë përgjegjësie.

Gjatë kësaj mbledhjeje, betimin e dha asamblistja e re nga radhët e AAK-së, Vlora Elshani-Neziri, e cila e zëvendësoi Albana Ndrecajn, e cila kishte dhënë dorëheqje.

Në kohën e pyetjeve të ndryshme, Leonard Shala nga LVV u interesua rreth dështimit të një investimi nga një biznesmen gjerman, i cili kishte ikur nga Suhareka në mungesë të pronës.