Shpjegimet për tenderët e Blerim Kuçit në Suharekë

Bali Muharremaj, kryetar i Komunës së Suharekës është i ftuar në debatin e sontëm ‘Jeta në Komunë’, përballë gazetares Jeta Xharra.

Të pranishëm në këtë debat janë edhe asamblistë: Jeton Rrakaqi nga PDK, Aziz Bytyqi nga AAK, Nexhat Ramadani nga LDK, Dukagjin Palushi asamblist i pavarur, Bashkim Ndrecaj po ashtu asamblist i pavarur, si dhe përmes ZOOM-it pjesë e debatit do të jenë Herolind Bytyqi gazetar dhe Brahim Curri nga LDK.

Debati pothuajse nisi me temën për tenderin e sheshit të qytetit në Suharekës, dhe ankesat lidhur me vonesat në realizimin e punimeve.

Jeta Xharra tregoi se në muajin shtator të vitit 2019, KALLXO.com raportoi se Blerim Kuçi i AAK-së kishte fituar tender në vlerë prej 1.7 milion eurove nga komuna e kryetarit Bali Muharremaj që vie nga i njëjti subjekti politik. Gjithashtu Kuçi kishte fituar edhe tenderin tjerët prej 70 mijë eurosh, për punët shtesë në këtë shesh mbi 79 mijë eurove.

Lidhur me këtë kryetari Muharremaj thotë se ai nuk ia ka dhënë tenderin kompanisë së bashkëpartiakut, por ligji.

“Në rend të parë unë s`ia kam dhanë tenderin Blerim Kuçit, ia ka nda Ligji që është në fuqi. Planifikimi u kon dy milionë euro, mirëpo kompania e cila ka bërë projektimin ka harrue me qitë kanalizimin”, deklaroi Muharemaj.