Foto: Policia e Kosovës

Ministri viziton Policinë, bisedojnë për sigurimet shëndetësore

Gjatë ditës së sotme ministri i Punëve të Brendshme, Ekrem Mustafa, në një vizitë zyrtare  ka takuar drejtorin e  Përgjithshëm i Policisë së Kosovës  Rashit Qalaj, më të cilin kanë diskutuar për çështjet të cilat ministria duhet t’i ketë prioritet karshi këtij institucioni.

“U diskutuan tema mjaft të rëndësishme të cilat kanë të bëjnë me realizimin e objektivave strategjike që ndërlidhen me sigurinë e përgjithshme, ruajtjen e rendit dhe sigurisë publike, si dhe luftën kundër krimit të organizuar dhe korrupsionit. Poashtu edhe çështje tjera me prioritet, si: Ligji për pensionimin e parakohshëm të zyrtarëve të PK-së, Ligji për pagat, mungesa e sigurimeve shëndetësore për PK-në, si dhe çështje tjera me interes të përbashkët ndërinstitucional”, thuhet në njoftimin e Policisë së Kosovës.

Policia njofton se ministri Mustafa është takuar edhe me drejtorët e departamenteve ligjore ku në fund edhe janë dakorduar për përkrahje dhe bashkëpunim  të ndërsjellët.

“Takimi rezultoi me zotimin e përbashkët për bashkëpunim dhe përkrahje të ndërsjellë, si dhe për angazhime shtesë nga të gjithë të pranishmit, me qëllim të përmbushjes së detyrave dhe obligimeve policore, të cilat janë në interes të qytetarëve dhe vendit”, thuhet tutje në komunikatë.