Ministri Flet se si Lëshohen Lejet për Fluturime Charter në Kosovë

Ministri i Infrastrukturës, Pal Lekaj, ka lëshuar një deklaratë në të cilën ka treguar rregullat e dhënies së lejeve për fluturimet ‘charter’ nga Aeroporti Ndërkombëtar i Prishtinës “Adem Jashari”.

Deklarata e Lekajt ka të bëjë me deportimin e 6 shtetasve turq nga Kosova në Turqi, të cilët si pjesë e institucioneve edukative “Gulistan” janë në listën e të kërkuarve nga autoritetet turke si të afeërt me klerikun turk në ekzil, Fetullah Gulen.

Në vazhdim lexojeni të plotë deklaratën e ministrit Lekaj:

“Duke qenë të indinjuar me çka ka ndodhur dje, “deportimi i shtetasve turq nga Kosova”. Për opinionin e gjerë publik me duhet të sqarohem përsa i përket anës ligjore të dhënies së lejes për fluturime charter (apo ad hoc) për të gjitha rastet por edhe për rastin në fjalë.

Bazuar në nenin 5 të rregullores mbi kërkesat për linja të përkohëshme të Aeroplaneve, Ministria e Infrastrukturës lejon të gjitha fluturimet të cilat i përmbushin kërkesat sipas rregullores 2015/2 për aprovimin e fluturimeve charter dhe jo – HPEA. Afati për aplikim duhet të jetë 3 ditë punë dhe ka të bëjë vetëm për kohë të mjaftueshme me qëllim të verifikimit të dokumentacionit dhe jo afat pas të cilit duhet të lëshohet leja.

Prandaj i bëj thirrje të gjithëve që të ruajnë veten nga çfarëdo “ekspertizë” edhe të leximit të rregullave të Aviacionit Civil të Kosovës edhe asaj ndërkombëtare, nuk kemi pse tentojmë të hedhim fajin të dikush që përsa i përket Aviacionit Civil, e bën vetëm rregullimin ekonomik, të drejtat e trafikut ajror, ndërsa sipas ligjeve në fuqi me atë që quhet “Siguria” dhe “Sigurimi” i Aeroportit Ndërkombëtar të Prishtinës, merren organet e sigurisë.

Duke qenë kështu, e them me përgjegjësinë më të lartë se asnjë njeri i Aleancës nuk ka qenë i përfshirë. Çkado që është shkruar ka qenë dhe është e pavërtetë dhe tendencë për të manipuluar opinionin”, thuhet në sqarimin e ministrit të Infrastrukturës Pal Lekaj.​