Milorad Zajiq, i akuzuari për krime të luftës në Dush të Klinës kundërshton aktakuzën në Gjykatë

Në seancën për krime lufte në të cilin po gjykohet Milorad Zajiq, mbrojtësi i tij Dejan Vasiç, ka paraqitur kërkesën për hedhjen e aktakuzës dhe kundërshtimin e provave.

Kërkesën e tillë e ka kundërshtuar prokurorja  Habibe Salihi.

“Kjo prokurori ka pranuar kërkesën për hedhjen e aktakuzës dhe kundërshtimin e provave, dhe konsideron se nuk qëndrojnë pretendimet e mbrojtjes për shkak se aktakuza ka prova të mjaftueshme të cilat e mbështesin akuzën dhe janë siguruar në mënyrë të ligjshme, andaj gjykatës i propozojmë që kërkesën për hedhje të aktakuzës ta refuzojë”, thuhet në përgjigjen për kundërshtimin e akuzës dhe provave.

Zajicq në shqyrtimin fillestar ishte deklaruar i pafajshëm në lidhje me akuzat për krime lufte.

“Jam i pafajshëm për akuzat që më ngarkohen”, pati deklaruar Zajiq.

Ai akuzohet se kishte marrë pjesë në përndjekjen e fqinjëve të tij shqiptarë në fshatin Dush të Klinës në qershor të vitit 1998.

Në aktakuzë thuhet se Zajiq e kishte ofruar shtëpinë e tij si bazë për forcat e armatosura serbe duke qëlluar në drejtim të shtëpive të shqiptarëve.

Sipas aktakuzës, ai ishte parë nga fqinjët derisa shkarkonte nga makina e tij Zastava armë, ndërsa në mbrëmje i vetëm kishte nisur të qëllonte në drejtim të shtëpive të shqiptarëve.

Nga këto sulme mbetën të djegur në shtëpitë e tyre tre të moshuarit  Zade, Osman dhe Haradin Marmullaku.

Viktima të këtyre sulmeve ishin edhe katër banorë të tjerë të vrarë, gruaja dhe vajza e të dëmtuarit Xhemë Marmullaku dhe Ismet e Bashkim Marmullaku.

KALLXO.com ka raportuar në vazhdimësi lidhur me këtë proces gjyqësor për krime lufte.

https://kallxo.com/deshton-seanca-per-krime-lufte/

https://kallxo.com/serbi-i-akuzuar-per-krime-lufte-sot-para-gjykates-ne-peje/

https://kallxo.com/i-akuzuari-per-krime-lufte-ne-kline-ndihet-i-pafajshem/

https://kallxo.com/aktakuza-si-u-perfshine-serbet-e-klines-ne-vrasjen-e-shqiptareve/

https://kallxo.com/sot-nis-gjykimi-ndaj-serbit-te-dyshuar-per-krime-lufte-ne-kline/