Ish-ministri Ferid Agani në një seancë gjyqësore në rastin "Stenta" - Foto: KALLXO.com
Mbyllet për Mediat Gjykimi në Rastin 'Stenta'
Në gjykimin e mjekëve në rastin “Stenta”, Gjykata u lejoi mediave të marrin pamje për vetëm një minutë dhe më pas iu kërkua ta lëshonin sallën. Këtë veprim Gjykata e arsyetoi me mungesën e vendeve në sallën e gjykimit.
Në kohën kur kaloi minuta e lejuar, mediat u nxorën nga salla.
Dhe, ndonëse gjykatësja Shadije Gërguri nuk ka marrë vendim për mbylljen e seancës, mediat nuk u lejuan të qëndrojnë as pranë vendit ku po zhvillohet gjykimi.
Në rastin “Stenta” të akuzuar janë 44 mjekë, 1 infermier të punësuar në institucione publike shëndetësore dhe 13 punonjës ose ish-punonjës të sektorit shëndetësor privat.
http://kallxo.com/aktakuze-ndaj-ferid-aganit-dhe-63-personave-te-tjere/
Pjesë e këtij gjykimi janë edhe ish-ministri i Shëndetësisë, Ferid Agani, dhe sekretari i përhershëm i kësaj Ministrie, Gani Shabani, që akuzohen për keqpërdorim të detyrës zyrtare gjatë lëshimit të lejeve për trajtimin e pacientëve jashtë vendit.
Sipas aktakuzës, këta të pandehur kanë vepruar në kundërshtim me Ligjin për Prokurimin Publik dhe udhëzimet administrative të Ministrisë së Shëndetësisë, si dhe kanë lejuar pagesat për trajtimin e pacientëve jashtë institucioneve publike shëndetësore për periudhën 2011-2015.
Sipas aktakuzës, këta dy të akuzuar i kanë mundësuar përfitim financiar spitalit privat “IMH” në shumë prej 4,050,958.00 euro dhe spitalit privat “EDA” në shumë prej 504,595.00 euro apo të dyja spitaleve në shumë të përgjithshme prej 4,555,553.00 euro, duke e dëmtuar buxhetin e Kosovës ashtu që në vend që të lejoheshin pagesat deri ne 70% të shpenzime për trajtim mjekësor, të njëjtit lejuan pagesat prej 100 % edhe për rastet kur nuk ishin plotësuar kushtet ligjore, pra për rastet kur pacientët nuk ishin invalidë të luftës ose raste sociale.
Pika e dytë e akuzës i ngarkon të të pandehurit G.B., S.Gj., F.Sh., B.Z., H S., B.G., F.H., K.P., D.G., H.Q., A.K., E.P., E.H., A.P., N.M., D.K., A.B., Xh.K., L.P., R.M. për keqpërdorim të pozitës po ashtu.
Prokuroria pretendon se këta të pandehur duke vepruar në kundërshtim me udhëzimet administrative të Ministrisë së Shëndetësisë u kanë lëshuar pacientëve ose familjarëve të tyre letrat referuese për trajtim mjekësor jashtë institucioneve publike shëndetësore, pasi që të njëjtit i kishin kryer të gjitha trajtimet mjekësore dhe më nuk kishin nevojë për trajtim mjekësor.
Sipas Prokurorisë në disa raste këto letra referuese i kishin lëshuar edhe për persona të vdekur, të cilat letra pastaj ishin njëri ndër kushtet kryesore për t’ua mundësuar të pandehurve F.A. dhe G.Sh. që të lejonin pagesat për trajtim mjekësor jashtë institucioneve publike shëndetësore, të cilat pagesa për periudhën 2011–2015 kanë arritur për të dy spitale private në shumë prej 4,555,553.00 euro.
Sipas pikës 3 të aktakuzës të pandehurit: G.B., D.G., E.M., N.R., N.Z., A.K., S.Gj., F.S., L.K., H.S., B.Z., R.E., H.H., B.G., F.S., A.L., A.B., H.Q., G.B., B.M., D.M., B.K., F.S., M.G., M.S., Sh.Sh., F.H., K.P., B.G., B.P., F.Sh., M.A., I.A., P.A., A.S., S.Sh. dhe L.P., janë akuzuar secili për veprën penale të keqpërdorimit të pozitës zyrtare si dhe marrje të ryshfetit.
Skandali i stentave u trajtua edhe në emisionin “Jeta në Kosovë”.
Sipas Prokurorisë, këta të pandehur duke bashkëpunuar më pronarët dhe aksionarët e spitaleve private “IMH” dhe “EDA” kanë keqpërdorur pozitën e tyre zyrtare dhe kanë tejkaluar autorizimet zyrtare, duke referuar dhe dërguar pacientë nga institucionet publike shëndetësore në këto dy spitale private.
Sipas Prokurorisë për këtë kanë marrë ryshfet nga këto spitale, shuma të parave që shkonin deri në 500 euro nëse pacienti i referuar/dërguar vendoste stentë dhe 150 euro nëse pacienti bënte vetëm koronarografinë. Shumat e ryshfetit që merrnin këta të pandehur sillen nga 150 euro deri në 21,985 euro.
Gjithnjë sipas aktakuzës, me veprimet e tyre këta të pandehur u shkaktonin dëm pacientëve, i cili dëm sillej nga 700 euro deri në 18,000.00 euro për person dhe më këto veprime për periudhën 2011-2015 ia kanë mundësuar përfitimet financiare spitalit “IMH” në shumë prej 4,050,958.00 euro dhe spitalit privat “EDA” në shumë prej 504,595.00 euro ose të dyja spitaleve në shumë të përgjithshme prej 4,555,553.00 euro.
Mjekët dhe punonjësit shëndetësorë që po gjykohen sot qenë arrestuar më 9 tetor 2014.
Një ditë më pas KALLXO.com siguroi dokumentin e Prokurorisë me të cilin kërkohej paraburgim për mjekët e arrestuar në të cilin të arrestuarit e atëhershëm me SMS flisnin për pacientë që nga institucionet publike i dërgonin në ato private në këmbim të përfitimit material.
http://kallxo.com/sms-te-e-mjekeve-te-arrestuar/
