Çekani i gjykatës - Foto: KALLXO.com
Mbrohen në Heshtje të Akuzuarit për Sulmin në Kuvend
Të akuzuarit për sulmin kundër ndërtesës së Kuvendit të Kosovës, Atdhe Arifi, Frashër Krasniqi, Egzon Haliti dhe Adea Batusha u deklaruan se do të mbrohen në heshtje.
Ata nuk pranuan të deklarohen para trupit gjykues duke e cilësuar procesin politik.
Me këtë deklarim seanca e sotme përfundoi.
Ndërkohë, sot, gjatë procedurës së administrimit të provave, prokurori i Prokurorisë Speciale, Abdurrahim Islami, tha se nga ekspertiza e ADN-së, ekspertiza daktiloskopike dhe provat e tjera, nuk ka ndonjë provë që i lidhë direkt të akuzuarit me kryerjen e veprës.
Pas deklaratës së prokurorit, avokati i të akuzuarit Atdhe Arifi, Ramiz Krasniqi, tha se nuk di se çfarë i mbetet mbrojtjes të deklarojë kur prokurori të gjitha provat që i prezantoi janë prova shfajësuese.
“Dhe kjo është sjellje profesionale e prokurorit që zbatoi dispozitat e kodit të procedurës që t’i propozojë edhe provat shfajësuese”, tha avokati Krasniqi.
Ndërsa, Tomë Gashi, avokati i të akuzuarit Frashër Krasniqi, tha se krejt çka është vërtetuar deri më tani është se sulmi në ndërtesën më të rëndësishme të Kosovës ka ndodhur në vendin dhe kohën e caktuar dhe atë nuk e konteston askush.
“Por, prokurori ka dështuar me prova materiale të vërtetojë se të akuzuarit e këtij rasti janë autorët e sulmit”, tha avokati Gashi.
http://kallxo.com/prokurori-ekspertizat-nuk-lidhin-direkt-te-akuzuarit-sulmin-ne-kuvend/
Në këtë rast, të akuzuar për sulmin me mjet shpërthyes kundër ndërtesës së Kuvendit të Kosovës janë Atdhe Arifi, Egzon Haliti, Adea Batusha dhe Frashër Krasniqi.
Katër aktivistët e Vetëvendosjes akuzohen për sulmin e kryer në gusht të vitit 2016.
Të katër të akuzuarit e këtij rasti ishin deklaruar të pafajshëm në seancën e mbajtur më 28 shkurt të këtij viti ndërsa aktakuzën e kishin quajtur politike ndërsa kërkesat e tyre për hedhje të aktakuzës dhe pushim të procedurës ishin refuzuar nga Gjykata Themelore.
http://kallxo.com/aktivistet-e-vv-se-deklarohen-te-pafajshem-e-quajne-politike-aktakuzen/
KALLXO.com ka raportuar na vazhdimësi lidhur me këtë rast dhe raportet mund t’i gjeni në këtë link.
Seanca e radhës, ku do të jepet fjala përfundimtare, u caktua për datën 13 nëntor.