Foto: Komuna e Gjilanit

Matoshi konfirmon mbështetjen e projekteve për Gjilanin në vlerë prej mbi 1.6 milionë euro

Kryetari i Komunës së Gjilanit, Lutfi Haziri, ka marrë konfirmimin e ministrit të Mjedisit dhe Planifikimit Hapësinor, Fatmir Matoshi, për financimin e projekteve kapitale që e kalojnë shifrën e mbi 1.6 milionë euro në fushën e mjedisit.

Projektet që do të financohen janë impianti, shtrati i lumit Mirusha, ndërtimi i lumit Dobërçan dhe shtrati i lumit Stanishorka.

“Buxheti i miratuar në Kuvendin e Republikës konfirmon mbështetjen e madhe të ministrit Matoshi për projektet e Gjilanit. Ne aspirojmë ta bëjmë Gjilanin qytet të gjelbër. E falënderoj për grantin prej 100 mijë euro dhe për mbështetjen e në projektet tjera që e kapin shifrën e mbi 1.6 milion eurove për këtë vit. Përpos impiantit, shtratit të lumit “Mirusha”, nga partneritet me Ministrinë e Mjedisit përfundimisht do të përfitojnë fshatrat, Pogragjë, Dobërçan, Lladova e Zhegra”, ka thënë kryetari Lutfi Haziri pas takimit.

Ministri i Mjedisit, Fatmir Matoshi, ka thënë që po synohet që Gjilani të bëhet një qytet ekologjik.

“Ne synojmë ta bëjmë Gjilanin qytet ekologjik. 100 mijë euro grante të fituara do të shkojnë prapë në ambientin. Përpos këtyre, do të fillojmë me një projekt me 700 mijë euro në zonat e gjelbra. 250 mijë euro për lumin Mirusha, ndërtimi i lumit Dobërçan 550 mijë euro, rregullimi i shtratit të lumit Stanishorka 100 mijë euro. Nuk do të jenë të vetmet projekte. Do t’i mbjellim 11 fidanë nga 11 nxënës të moshës 11-vjeçare për 11-vjetorin e Pavarësisë”, është shprehur ministri Matoshi,

Pas takimit, kryetari Haziri dhe ministri Matoshi kanë marrë pjesë në mbjelljen aktivitetet që shënojnë 11-vjetorin e shpalljes së Pavarësisë së Kosovës, në mbjelljen 11 fidaneve në shkollën “Abaz Ajeti”, në aktivitetin kulturor të fëmijëve të shkollës fillore “Thimi Mitko”, sikurse që kanë vizituar shtratin e lumit Mirusha në pjesën e epërme.