Limaj Ankohet për Vonesën e Procesverbaleve

Fatmir Limaj dhe avokati i tij Tahir Rrecaj janë ankuar ndaj vonesës së procesverbalit të seancës së kaluar, i cili u është dorëzuar dje.

Të njëjtën ankesë e kishte edhe Arianit Koci, avokati i Endrit Shalës, i akuzuari tjetër në rastin e njohur si MTPT.

“Fatmirësisht që vëllimi nuk ishte i madh sepse përndryshe nuk do të kishim asnjë mundësi të përgatiteshim për seancë”, tha Limaj sot duke iu referuar procesverbalit nga seanca e kaluar ku dëshmoi Zukri Qarolli.

Kryetarja e trupit gjykues, Maria Tuma, tha se e kupton shqetësimin e Limajt dhe tregoi se këto vonesa janë për shkak të disa çështjeve të brendshme që lidhen me përkthyesit.

Tuma madje e sugjeroi mbrojtjen e Limajt të mbajë shënime gjatë seancës, duke thënë se ashtu mund të përgatiten.

Avokati i Limajt, Tahir Rrecaj duke ju përgjigjur gjyqtares tha se vonesa në dorëzimin e procesverbaleve mbrojtjes bie ndesh me të drejtat e garantuara të mbrojtjes që sanksionohen me Konventën Evropiane për të Drejtat e Njeriut dhe konventat e tjera për gjykim të drejtë.

Shqetësim lidhur me vonesën e procesverbaleve paraqiti edhe avokati Arianit Koci.

“Unë nuk e kuptoj se pse procesverbalet nuk na dorëzohen ditën kur mbahet seanca”, tha Koci.

Në seancën e sotme ishte paraparë që avokatët e të akuzuarve t’i bënin pyetje dëshmitarit të Prokurorisë, Zukri Qarolli, por asnjëri prej tyre nuk e pa të nevojshme një gjë të tillë.

Seanca e radhës do të vazhdojë nesër kur do të dëshmojë Enver Demolli, i cili sipas prokurorit Charles Hardaway është marrë me hetimin e pretendimeve të Mehmet Shkodrës që i kishte paraqitur në Agjencinë Kundër Korrupsionit.

Në këtë gjykim të akuzuar për krim të organizuar janë Fatmir LImaj, Endrit Shala dhe Nexhat Krasniqi.

Pjesë e aktakuzës janë edhe Shpëtim Telaku dhe Florim Zuka.

Në seancën e kaluar, dëshmitari Qarolli foli për atë që i kishte thënë Mehmet Shkodra në lidhje me njerëzit e njohur që kishte në Qeveri, duke përfshirë kryeshefin e saj, Hashim Thaçin.

Raportin nga dëshmia e tij dhe raportimet e tjera rreth këtij rasti mund t’i gjeni në linkun e mëposhtëm.

http://kallxo.com/deshmitari-permend-hashimin-ne-rastin-e-limajt/